माेरङमा मन्दिर, मस्जिद र चर्चमा चर्को आवाज बजाउन रोक

विराटनगर । जिल्ला प्रशासन कार्यालय मोरङले जिल्लाभित्रका सबै धार्मिक स्थलहरूलाई चर्को आवाजमा लाउडस्पीकर, माइक र साउण्ड बक्स प्रयोग नगर्न निर्देशन दिएकाे छ । विभिन्न धर्मावलम्बीहरूले धार्मिक क्रियाकलाप सञ्चालन गर्दा हुने उच्च ध्वनिका कारण जनस्वास्थ्यमा गम्भीर असर परेको जनगुनासो आएकाे उल्लेख गर्दै प्रशासनले यस्तो निर्देशन जारी गरेकाे हाे ।

यसअघि माेरङ प्रशासनले डिजे प्रयाेगमा राेक लगाएकाे थियाे । बिहीबार सूचना जारी गर्दै मन्दिर, मस्जिद, चर्च, गुम्वा लगायतका सबै धार्मिक स्थलहरूलाई ध्वनि प्रदुषण सम्बन्धी मापदण्ड कडाइका साथ पालना गर्न निर्देशन दिएकाे हाे ।

चर्को आवाजका कारण घरमा रहेका बालबालिका, वृद्धवृद्धा र बिरामीहरूमा मानसिक दीर्घरोगको जोखिम बढेको प्रशासनको सचनामा उल्लेख छ । प्रशासनकाे यो निर्देशन सर्वोच्च अदालतको मिति २०८०/९/१६ को फैसला र नेपाल राजपत्रमा प्रकाशित ध्वनि मापदण्डको आधारमा जारी गरिएको हो ।

सरकारले तोकेको ध्वनि मापदण्ड अनुसार ग्रामीण क्षेत्रमा दिउँसो ४५ डेसिबल र राती ४० डेसिबलसम्म आवाज बजाउन पाइन्छ । शहरी आवास क्षेत्रमामा दिउँसो ५५ डेसिबल र राती ५० डेसिबलसम्म मात्रै बजाउनु पर्ने उल्लेख छ ।

सहायक प्रमुख जिल्ला अधिकारी पवनराज कोइरालाद्वारा हस्ताक्षरित सूचनामा भनिएको छ, ‘तोकिएको मापदण्ड विपरित ध्वनि प्रदुषण गरे वा गराएमा प्रचलित कानुन बमोजिम कडा कारबाही गरिनेछ।’