जंगलमा ‘हिट एण्ड रन’: चार दिनपछि चालक पक्राउ

विराटनगर । मोरङको कानेपोखरी गाउँपालिका – ७ स्थित जङ्गलमा पैदल यात्रीलाई ठक्कर दिएर फरार भएको सरकारी सवारीसहित चालक पक्राउ परेका छन् । गत आइतबार भएको उक्त ‘हिट एण्ड रन’ घटनामा संलग्न सवारी र चालकलाई प्रहरीले चार दिनको सूक्ष्म अनुसन्धानपछि बुधबार राति पक्राउ गरेकाे हाे ।

गत आइतबार पूर्व–पश्चिम राजमार्गमा बा २ झ २२२६ नम्बरको गाडीले ठक्कर दिँदा पथरीशनिश्चरे–१० का ६० वर्षीय गोविन्द लिम्बू गम्भीर घाइते भएका थिए । उपचारका क्रममा उनको मृत्यु भए पनि जङ्गल क्षेत्रमा सिसी क्यामेरा नहुँदा ठक्कर दिने सवारी पत्ता लगाउन प्रहरीलाई सकस परेको थियो । घटनास्थलमा प्रमाणका रूपमा गाडीका केही फुटेका पार्टपुर्जा मात्र बाँकी थिए ।

प्रहरीले घटनास्थलमा भेटिएका साना पार्टपुर्जालाई ‘क्लु’ बनाएर अनुसन्धान अघि बढाइएको थियो । राजमार्गका विभिन्न स्थानका सिसी क्यामेरा फुटेज विश्लेषण गर्दै जाँदा उक्त गाडी सुनसरीको इटहरीस्थित ‘हेभी इक्विपमेन्ट सडक विभाग’ को रहेको पुष्टि भयो । त्यसपछि प्रहरी टोलीले बुधबार राति १० बजे इटहरीस्थित विभागकै कार्यालयभित्र लुकाइराखेको अवस्थामा सरकारी गाडी फेला पारेको हो ।

दुर्घटना गराएर फरार रहेका चालक सिराहा सुखीपुर–८ का ४४ वर्षीय राम उद्गार मण्डललाई पनि प्रहरीले नियन्त्रणमा लिएको छ । पक्राउ परेका चालक मण्डलविरुद्ध सवारी ज्यान मुद्दा अन्तर्गत कानुनी प्रक्रिया अघि बढाइएको मोरङ प्रहरी प्रवक्ता डिएसपी मकेन्द्रकुमार मिश्रले जानकारी दिए ।