कोशीसहितका प्रदेशमा भारी वर्षाको सम्भावना, सतर्क रहन आग्रह

काठमाडौं । हाल देशभर मनसुनी वायुको प्रभावका कारण मौसममा बदली भई विभिन्न स्थानमा वर्षा भइरहेको छ ।

मौसम पूर्वानुमान महाशाखाका अनुसार मनसुनको न्यून चापीय रेखा नेपालको तराई भू-भाग नजिक रहेकाले आज देशभर साधारणतया बादल लाग्ने र धेरैजसो स्थानमा वर्षा हुने सम्भावना छ ।

आज दिउँसो र राति कोशी, बागमती र गण्डकी प्रदेशका धेरै स्थानमा तथा लुम्बिनी, कर्णाली र सुदूरपश्चिमका केही ठाउँमा मेघगर्जन र चट्याङसहित हल्कादेखि मध्यम वर्षाको प्रक्षेपण गरिएको छ ।

विशेषगरी कोशी, बागमती, गण्डकी र लुम्बिनी प्रदेशका थोरै स्थानमा भारी वर्षाकोसमेत सम्भावना रहेको छ ।

वर्षाका कारण बाढी, पहिरो, गेग्रान बहाव र भू-क्षयको जोखिम हुनसक्ने भन्दै विभागले सतर्कता अपनाउन अनुरोध गरेको छ । यसले कृषि, स्वास्थ्य, पर्यटन र सडक तथा हवाई यातायातमा समेत असर पार्न सक्ने भएकाले आवश्यक सावधानी अपनाउन र मौसमसम्बन्धी पछिल्लो जानकारीमा अद्यावधिक रहन महाशाखाले आग्रह गरेको छ ।