प्रहरीलाई देखेपछि पोखरीमा हाम फालेका युवककाे शव भेटियाे

विराटनगर । विराटनगर महानगरपालिका–१८ भेडियारीमा प्रहरीबाट जाेगिन् पोखरीमा हाम फालेका युवककाे शव फेला परेकाे छ  बुधबार भेडियारीमा प्रहरीले माेटरसाइकल राेक्न खाेज्दा  १७ वर्षीय मञ्जितकुमार यादव भागेर पाेखरीमा हाम्फालेका थिए । शुक्रबार बिहान उनकाे शव फेला परेकाे हाे ।

बुधबार बिहान गाँजासहितको मोटरसाइकल प्रहरीले रोक्न खोज्दा उनी पोखरीमा हाम फालेर बेपत्ता भएका थिए । उनीसँगै रहेका भारतीय नागरिक ४१ वर्षीय शिवधर यादवलाई भने प्रहरीले ६ किलो १३० ग्राम गाँजासहित नियन्त्रणमा लिएको छ ।

मोरङ प्रहरीका डीएसपी सन्तोष श्रेष्ठका अनुसार, बेपत्ता युवककाे खोजी कार्य जारी रहेकै अवस्थामा शुक्रबार बिहान १०ः३० बजेतिर शव भेडियारी पोखरीको बीच भागमा तैरिरहेको अवस्थामा भेटिएको हो ।  उनका अनुसार सशस्त्र प्रहरीको गोताखोर टोलीसहित स्थानीयले बुधबारदेखि नै उनको खोजी गरिरहेका थिए ।

प्रहरीले युवकले चलाएकाे भारतीय नम्बर प्लेट (बीआर ५० एएल ३६८७) को मोटरसाइकल र गाँजा नियन्त्रणमा लिएकाे छ ।