रामधुनीमा सवारी दुर्घटना हुँदा छाेराकाे मृत्यु, बुबा घाइते

विराटनगर । सुनसरीको रामधुनी नगरपालिका–५ मा सवारी दुर्घटना हुँदा एक युवकको मृत्यु भएको छ भने उनका बुबा घाइते भएका छन् ।

मंगलबार महेन्द्र राजमार्गमा पूर्वबाट पश्चिमतर्फ जाँदै गरेको प्र १–०४–००१ प ७६१५ नम्बरको १५० सीसीको यामाहा मोटरसाइकल अनियन्त्रित भई चिप्लिएर दुर्घटना हुँदा मोटरसाइकलमा पछाडि सवार रामधुनी–५ का २९ वर्षीय साजन गौतमको मृत्यु भएको हो ।

प्रहरीका अनुसार, मोटरसाइकल चिप्लिएर विपरीत दिशा (पश्चिमबाट पूर्व) तर्फ आउँदै गरेको प्र १–०१–००१ ख ४१०२ नम्बरको बसको पछाडिको भागमा ठोक्किन पुगेको थियो । दुर्घटनामा टाउकोमा गम्भीर चोट लागेका साजनको मोरङको टंकिसिनुवारीस्थित विराट टिचिङ अस्पतालमा उपचारका क्रममा मृत्यु भएको हो ।

दुर्घटनामा मोटरसाइकल चालक, मृतकका बुबा ५० वर्षीय बेद प्रसाद गौतम घाइते भएका छन् । उनको बायाँ हातमा चोट लागेको छ । घाइते दुवैलाई उपचारका लागि अस्पताल पुर्‍याइएको थियो ।

प्रहरीले दुर्घटनामा संलग्न बस र चालक उदयपुरको रौतामाई नगरपालिका–१ बस्ने ३७ वर्षीय धिरज कुमार तामाङलाई नियन्त्रणमा लिएको छ ।