पूर्वअर्थमन्त्री विष्णु पौडेल पक्राउ, एमालेकाे आपत्ति

काठमाडौं । नेकपा एमाले उपाध्यक्ष तथा पूर्वअर्थमन्त्री विष्णु पौडेल पक्राउ परेका छन् । सम्पत्ति शुद्धीकरण विभागले उनलाई सोमबार सुर्खेतबाट पक्राउ गरेको हो ।

पार्टीको कार्यक्रममा सहभागी हुन सर्खेत पुगेका उनी पक्राउ परेका थिए ।

पूर्वअर्थमन्त्रीसमेत रहेका उनलाई सम्पत्ति शुद्धीकरणसम्बन्धी मुद्दाको अनुसन्धानको सिलसिलामा पक्राउ गरिएको बताइएको छ ।

पार्टीको सांगठनिक कार्यक्रमका सिलसिलामा सुर्खेतमा रहेका बेला उपाध्यक्ष पौडेललाई सरकारले ‘अपहरणको शैलीमा’ गिरफ्तार गरेको भन्दै नेकपा एमालेले विरोध जनाएको छ ।

पार्टी अध्यक्ष केपी शर्मा ओलीले प्रेस वक्तव्य जारी गर्दै उपाध्यक्ष पौडेललाई सरकारले गैरकानुनी ढंगले गिरफ्तार गरेको भन्दै यसको विरोध गरेका हुन् ।

एमालेले पौडेलको पक्राउलाई अराजनीतिक, अलोकतान्त्रिक र नाङ्गो प्रतिशोधको पराकाष्ठा भनेको छ। ओलीले विज्ञप्तिमा भनेका छन्,‘यो दमनकारी कदम म र हाम्रो पार्टी नेकपा एमाले माथि लगातार भइरहेका शृङ्खलाबद्ध प्रहार र राजनीतिक षडयन्त्रको निरन्तरता हो भन्ने कुरा स्पष्ट छ ।’

अध्यक्ष ओलीले उपाध्यक्ष पौडेल सुर्खेतको कार्यक्रम सकेर पूर्वनिर्धारित कार्यतालिका अनुसार भोलिपल्टै काठमाडौँ फर्कने तयारीमा रहेको उल्लेख गरेका छन् । तर विधिको शासन र सामान्य कानुनी प्रक्रियाको समेत धज्जी उडाउँदै, जुनसुकै बेला सोधपुछ गर्न सकिने वा उनकै उपस्थितिमा प्रक्रिया अगाडि बढाउन सकिने विकल्पलाई नियतवश लत्याइएको ओलीको आरोप छ ।