हुलाकी राजमार्गको कटहरी खण्डमा तीन ट्रक फसे, नयाँ ठेक्काको तयारी

विराटनगर । हुलाकी राजमार्गअन्तर्गत मोरङको कटहरी खण्डमा सोमबार एकैसाथ तीनवटा मालबाहक ट्रक फसेका छन् । विराटनगरको हाटखोला– कटहरी खण्डमा ट्रकहरू फसेका हुन् । ट्रक फसेपछि  सवारी आवागमन प्रभावित भएको छ ।

वर्षाका कारण हिलाम्मे बनेको कच्ची सडकमा बढी भार बोकेका गाडीहरू फसेकाे हुलाकी राजमार्ग निर्देशनालय योजना कार्यालय इटहरीका प्रमुख युवराज पोखरेलले बताए । उनका अनुसार फसेका सवारी साधन निकाल्न मेसिन परिचालन गरिएको छ ।

विगतमा ठेक्का पाएको श्रेष्ठ कन्ट्रक्सनले समयमै काम नगरेपछि सो खण्डको ठेक्का तोडिएको थियो । जसका कारण करिब ६ किलोमिटर सडक लामो समयदेखि अलपत्र छ ।

प्रमुख पोखरेलले अबको एक साताभित्र सो खण्ड निर्माणका लागि नयाँ ठेक्का आह्वान गर्ने तयारी भइरहेको जानकारी दिए ।  ठेकेदार कम्पनीले दायर गरेकाे मुद्दा खारेज भइसकेकाले अब नयाँ प्रक्रियाका लागि कानुनी बाधा हटेको  उनले बताए । भौतिक पूर्वाधार तथा यातायात मन्त्रालयबाट सहमति प्राप्त भइसकेकाले यसै साता नयाँ ठेक्काको सूचना निकालिने उनले बताए ।