बिहारमा कोचिङ सेन्टर गाेली काण्डका आराेपी विराटनगरमा मृत भेटिए

विराटनगर । भारतमा पछिल्लो समय चर्चामा रहेको कोचिङ सेन्टर गोली काण्डका मुख्य आरोपी मध्येका एक विराटनगरमा मृत भेटिएका छन् । गत २ जुनमा खान सर नामले परिचित फैजल खानले बिहारको राजधानी पटनामा सञ्चालन गरेको खान ग्लोबल स्टडीजमा गोली चलेको थियो । सो घटनाका आरोपी मध्येका एक २४ वर्षीय भारतीय युवक प्रिन्स यादव विराटनगरमा मृत भेटिएका छन् । उनकाे एउटा अाँखामा चाेट छ । उनको मृत्यु भएपछि प्रहरीले उनीसँगै रहेका चार जनालाई पक्राउ गरेर अनुसन्धान सुरु गरेको छ ।

मोरङ प्रहरी स्रोतका अनुसार प्रिन्स यादव (प्रिन्स  आनन्द) पटनामा रहेकाे ज्ञानबिन्दु एकेडेमीका सञ्चालक रोशन आनन्दका कान्छा भाइ हुन् । दाजुभाइविरुद्ध खान सर एकेडेमीका सञ्चालक फैजल खानले जाहेरी दिएका थिए । प्रहरीकाे खाेजीमा परेपछि प्रिन्स भागेर विराटनगर  आएका थिए ।

केही दिनदेखि विराटनगर–१० स्थित शुभ होटलमा बस्दै आएका उनलाई  अचेत भएपछि शनिबार राति १०ः५५ मा उनकै साथीले न्युरो अस्पताल पुर्‍याएका थिए । न्यूरो अस्पताल प्रशासनका अनुसार अस्पताल पुर्याउँदा उनको मृत्यु भइसकेको थियो ।

मृतकको पृष्ठभूमि विवादसँग जोडिएका कारण उनको मृत्युले शंका उत्पन्न गराएको छ। प्रहरीका अनुसार मृतकको  आँखाकाे डिलमा सामान्य चाेट बाहेक अन्य कुनै चोटपटक देखिएको थियो । घटना शंकास्पद देखिएपछि प्रहरीले उनीसँगै रहेका बिहारको सहरसाका २५ वर्षीय अंकितकुमार यादव, २७ वर्षीय रोशन यादव, २१ वर्षीय लटु यादव र ३० वर्षीय जयराम यादवलाई नियन्त्रणमा लिएर अनुसन्धान गरिरहेको हो ।

माेरङ प्रहरी प्रमुख कबित कटवालका अनुसार यादव जेठ २० गते साथीहरूसँग विराटनगर  आएकाे देखिन्छ । सुरुमा मेट्राे हाेटलमा २ दिन बसेका उनी त्यसपछि शुभ हाेटलमा सरेका थिए । यादवको मृत्युको विषयमा प्रहरीले अनुसन्धान गरिरहेको छ । शवको पोस्टमार्टम गरी परिवारलाई जिम्मा लगाइएको बताउँदै प्रहरी उपरीक्षक कटवालले विस्तृत अनुसन्धान भइरहेकाे बताए ।

भारतीय सञ्चार माध्ययमका अनुसार कुनै समय खान सरले परिचित फैजल खान र प्रिन्सका दाजु रोशन आनन्दसँगै अध्यापन गराउँथे । कोरोना महामारीको समयमा कोचिङ सेन्टर सुरु गरेपछि उनीहरुबीच टकराव सुरु भएको थियो । गत जुन २ मा भने ज्ञानबिन्दु कोचिङ सेन्टरका सञ्चालक रोशन आनन्दको समूहले खान सरको सेन्टरमा आक्रमण गरेको आरोप छ । सो घटनामा खान ग्लोबल स्टडीजका सुरक्षाकर्मीले पनि गोली चलाएको देखिएको थियो । यो घटनामा बिहार प्रहरीले फैजल खानलाई पनि पक्राउ गर्न खोजेको थियो । तर,उनको गिरफरतारीमा अदालतले रोक लगायो । ज्ञानबिन्दु कोचिङ सेन्टरका सञ्चालक रोशन आनन्द भने प्रहरी हिरासतमै छन् ।