सीमा विवादमा प्रधानमन्त्रीकाे अभिव्यक्ति परराष्ट्रमन्त्रीले सच्याए

काठमाडाैं । भारतको औपचारिक भ्रमणमा रहेका परराष्ट्रमन्त्री शिशिर खनालले नेपाल-भारत सीमा विवादमा बेलायतको मध्यस्थता नखोजिएको प्रस्ट पारेका छन् ।

प्रधानमन्त्री बालेन शाहले केही दिनअघि संसदमा ‘सीमा विवादबारे बेलायत सरकारले पनि सरोकार राख्नुपर्ने र यसबारे कुरा भइरहेको’ भनी दिएको अभिव्यक्तिको कूटनीतिक वृत्तमा चर्चा भएपछि मन्त्री खनालले त्यसलाई सच्याएका हुन् ।

नयाँदिल्लीमा आयोजित पत्रकार सम्मेलनमा मन्त्री खनालले नेपालले तेस्रो पक्षको मध्यस्थता नभई ऐतिहासिक प्रमाणका लागि मात्र बेलायतसँग समन्वय गर्न खोजेको बताए । ‘हामी मध्यस्थताको खोजीमा छैनौं,’ उनले भने,’१८१६ को सुगौली सन्धि र त्यसताकाका आधिकारिक नक्सा तथा दस्ताबेजहरू बेलायतको पुस्तकालय र म्युजियमहरूमा सुरक्षित रहेकाले ती प्रमाण जुटाउन मात्र कोसिस गरिरहेका हौं ।’

लिपुलेक, लिम्पियाधुरा र कालापानी समेटिएको नेपाली भूभागका विषयमा नेपालको अडान स्पष्ट रहेको उल्लेख गर्दै खनालले यो समस्या भारतसँगको द्विपक्षीय कूटनीतिक संवाद र ‘टेबल टक’ बाटै समाधान गरिने बताए । भारतले सन् १८५० पछि फेरबदल गरिएका नक्सालाई आधार मान्दै आएको सन्दर्भमा, नेपालले सुगौली सन्धिका बेलाका सक्कल नक्सा र पत्राचारका आधारमा आफ्नो दाबी बलियो बनाउन खोजेको परराष्ट्र मन्त्रालयको भनाइ छ ।