रोमानिया पठाइदिने भन्दै ठगी गरेकाे आराेपमा माेरङबाट दुई जना पक्राउ

विराटनगर ।वैदेशिक रोजगारीका लागि रोमानिया पठाइदिने भनेर सर्वसाधारणलाई ठगी गरेको आरोपमा मोरङबाट मेनपावर सञ्चालक पक्राउ परेका छन् ।

मोरङको रतुवामाई नगरपालिका–८ घर भएका ३७ वर्षीय उद्धव पाठकलाई पक्राउ गरेकाे हाे । मोरङ प्रहरी प्रमुख एसपी कवित कटवालका अनुसार पाठकले रतुवामाई–८ दाम्राभिट्टामा के एस ए नामक म्यानपावर सञ्चालन गरिरहेका थिए ।

पाठकसँगै म्यानपावरका लेखापाल रतुवामाई–९ का अन्दाजी २५ वर्षीय अभि भण्डारीलाई पनि प्रहरीले पक्राउ गरेको छ ।

पाठक र भण्डारीविरुद्ध ठगी मुद्दा चलाउन मंगलबार अदालतबाट ६ दिनको म्याद थप गरेर अनुसन्धानको बाँकी प्रक्रिया अघि बढाइएको एसपी कटवालले दिए ।

‘रोमानिया भन्ने देश पठाउने प्रलोभन देखाएर धेरै सर्वसाधारणसँग लाखौं रूपैयाँ पैसा असुलेको पाइयो । ३–४ वर्षदेखि पैसा लिएर अहिलेसम्म फिर्ता नगरेको पाइयो,’ एसपी कटवालले भने । पाठकलाई लामो समयदेखि प्रहरीले खोजी गरिरहेको थियो ।

प्रहरीका अनुसार उनीविरुद्ध इलाका प्रहरी कार्यालय सिजुवा र उर्लाबारी तथा जिल्ला प्रहरी कार्यालय मोरङसहित काठमाडौंमा पनि किटानी जाहेरी परेको पाइएको छ । रोमानियामै बस्दै आएका कारण पाठक पक्राउ परेका थिएनन् । उनी केही समयअघि मात्रै नेपाल आएको प्रहरीले जनाएको छ ।