विश्वकप लिग २: अमेरिकामाथि नेपालकाे सानदार जित

काठमाडौं । विश्वकप क्रिकेट लिग-२ मा नेपालले अमेरिकामाथि सानदार जित निकालेकाे छ।  लिग २ अन्तर्गत नेपाल, अमेरिका र स्कटल्याण्ड सम्मिलित श्रृंखलाको अन्तिम खेलमा नेपालले अमेरिकालाई १२२ रनको फराकिलो अन्तरले हराएको हाे ।

शुक्रबार टियु क्रिकेट  ग्राउन्डमा टस हारेर पहिले ब्याटिङ गरेको नेपालले निर्धारित ५० ओभरमा ८ विकेट गुमाउँदै ३१७  रन बनाएको थियो। ३१८ रनको लक्ष्यसहित जवाफी ब्याटिङमा  उत्रिएको अमेरिका ४१.२ ओभरमा अलआउट हुँदै १९५ रनमा समेटियो ।

अमेरिका लागि सञ्जय कृष्णमूर्तिले ५६, नोस्थुश केन्जिनेले २९, शायन जाहाँगिरले २७, शेहन जयसूर्याले २६, साइतेजा मुक्कमल्लाले २२, मिलन्द कुमारले १२ र सौरभ नेत्रवाल्करले १० रन बनाए ।

बलिङतर्फ नेपालका सन्दिप लामिछानेले ३, दीपेन्द्र सिंह ऐरी, ललित राजवंशी र गुल्सन झाले २–२ तथा सोमपाल कामीले एक विकेट लिए।

पहिले ब्याटिङ गरेको नेपालका लागि इशान पाण्डे र दीपेन्द्र सिंह ऐरीले अर्धशतकीय इनिङ्स खेले । इशानले ८३ बलमा ८ चौका र १ छक्काको सहयोगमा ८४ रन बनाए । उनले तेस्रो विकेटका लागि कप्तान रोहित पौडेलसँग १ सय १० रनको शतकीय साझेदारी गरे । पौडेल ४६ रनमा एलबिडब्लु आउट भएका थिए ।  ओपनर कुशल भुर्तेल र आसिफ शेखले पहिलो विकेटका लागि ६९ रनको साझेदारी गरे । भुर्तेल ३९ बलमा ५ चौका प्रहार गर्दै २९ रनमा आउट हुँदा आसिफ शेखले ५७ बलमा ६ चौका प्रहार गर्दै ४३ रन बनाए।

नेपालका लागि दीपेन्द्र सिंह ऐरीले ३६ बलमा समान ४ चौका छक्का प्रहार गर्दै ५९ रन बनाए । गुल्सन झाले १५ रन बनाए भने आरिफ शेख १८ रनमा अविजित रहे ।