सन्ताेष साहले विराटनगरमा पनि सुरु गरे मिथिला थाली

विराटनगर । चर्चित सेफ सन्तोष साहले विराटनगरमा ‘मिथिला थाली’ र ‘जनकपुर फिस हाउस’ सञ्चालनमा ल्याएका छन् । अन्तर्राष्ट्रिय स्तरको प्रतिष्ठित रियालिटी सो ‘मास्टर शेफः द प्रोफेसनल’ मार्फत नेपाली खानालाई विश्वमा चिनाउन रहेका साहले विराटनगरकाे दुधफार्म (डीडीसी) चाेक अगाडि नयाँ आउटलेट सञ्चालनमा ल्याएका हुन् ।

मिथिला क्षेत्रको मौलिक स्वाद र संस्कृतिको संरक्षण गर्ने उद्देश्यका साथ एउटै छानामुनि दुवै ब्रान्डलाई विस्तार गरिएको सेफ साहले जानकारी दिए । विराटनगरमा खुलेको यो आउटलेट ‘मिथिला थाली’ को पाँचौँ शाखा हो । यसअघि जनकपुरका साथै काठमाडौंको झम्सिखेल, नक्साल (गैरीधारा) र गौशालामा यसका शाखाहरू सफलतापूर्वक सञ्चालनमा छन् ।