खुवा बेचेर मासिक एक लाख कमाउँछन् उत्तम श्रेष्ठ

हेटौडा । खुवा व्यवसायबाट हेटौंडा उपमहानगरपालिका – १७ उत्तम श्रेष्ठ आत्मनिर्भर बनेका छन् । उनी खुवा बेचेर मासिक एक लाख कमाउँछन् ।

उनको दैनिकी बिहान उठेदेखि राति अबेरसम्म खुवा घोटेर बित्ने गर्छ। दुई वर्षदेखि खुवा व्यवसायमा लागेका श्रेष्ठ उत्तम खुवा घर सञ्चालन गर्छन् ।

खुवा व्यवसायमा लाग्नुअघि श्रेष्ठले किराना पसल र तोरी मिल सञ्चालन गरेका थिए । गाउँघरमा उधारो धेरै हुने गरेकाले किराना पसलबाट खासै उपलब्धि हुन नसकेपछि श्रेष्ठ खुवा व्यवसायमा लागेका हुन् ।

खुवाको हब बन्दै गएको सोही स्थानमा खुवा व्यवसायलाई सम्हाल्न पुगेका उनले हिजोआज दैनिक तीस किलो खुवा बिक्री गर्दै आएका छन् ।

उनको पसलमा खुवासँगै खुवाका विभिन्न मिठाइका परिकार, केराको मम, छोइला, पनि, पुष्टकारी उत्पादनसँगै बिक्री हुनेगर्दछ ।

उनले दूधको आपूर्तिका लागि किसानलाई भैंसी किन्न लगानीसमेत गरेका छन् ।

‘खुवाको लागि भैंसी दूध आवश्यक पर्छ सोहीअनुरूप किसानलाई दस लाख लगानी गरिसकेको छु,’ उनले भने ।

परम्पराभन्दा आधुनिकतातर्फ लम्किँदै व्यवसाय गर्नका लागि उनले सफा, सुग्घर र आकर्षित सजावट गर्दै व्यवसायलाई अगाडि बढाइरहेका छन् ।

खुवा पेसा सम्हालेयता उनले ६ जनालाई रोजगारी दिएका छन् । खुवासँगै खाजा नास्ता लगायत व्यवसायबाट मासिक दस लाख कारोबार हुने श्रेष्ठले बताए । अरू पेसामा भन्दा खुवा पेसामा काम गर्दा सन्तुष्ट मिलेको उनको भनाइ छ ।

खुवा बेचेरै मासिक एक लाख कमाउन सकिने भएपछि उनले पैसा कमाउन विदेशिने युवापुस्तालाई देशमै कमाउन सकिने उदाहरण प्रस्तुत गरेका छन् ।

उनको पसलबाट उत्पादित खुवा काठमाडौं, ललितपुर, भक्तपुर, काभ्रो, चितवनलगायतका जिल्लामा निर्यात हुन्छ ।