लिलाबल्लभ अधिकारीका विषयमा एमालेको दुई निर्णय

विराटनगर । नेकपा एमाले कोशी प्रदेशका सांसद तथा पूर्वमन्त्री लिलाबल्लभ अधिकारीका विषयमा दुई वटा निर्णय गरेको छ ।

केन्द्रीय सचिवालय बैठकले मानव तस्करीको गम्भीर विवादमा फसेका अधिकारीलाई पार्टी सदस्यबाट निलम्बन गर्ने र अनुसन्धानका लागि सरकारलाई आग्रह गर्ने निर्णय गरेको हो ।

आन्तरिक मामिला तथा कानुन मन्त्री जापान भ्रमणका क्रममा नक्कली कर्मचारीलाई पनि साथमै लिएर गएको आरोप उनीमाथि छ । जापानको टोकियो विमानस्थलबाट फर्काइएपछि प्रहरीले अधिकारीको भ्रमण टोलीको सदस्य रहेको बताउने तीन जनालाई पक्राउ गरेको छ ।

अधिकारीले भने आफूलाई मानव तस्करको गिरोहले फसाएको बताउँदै आएका छन् । विवादमा परेपछि अधिकारीले बुधबार मन्त्रीकाे जिम्मेवारीबाट राजीनामा दिएका थिए । शुक्रबार पार्टीकाे जिम्मेबारीबाट मुक्त गर्न प्रदेश कमिटीमा निवेदन दिएका थिए ।

एमाले प्रदेश कमिटीले शनिबार अधिकारीलाई राष्ट्रिय महाधिवेशन प्रतिनिधि परिषद सदस्य तथा नेकपा एमालेको संगठित सदस्यबाट समेत निलम्बन गर्ने निर्णय गरेको थियो । सो निर्णय केन्द्रीय सचिवालयको बैठकले अनुमोदन गरेको हाे ।

शनिबार बसेको सचिवालय बैठकले अधिकारीमाथि लागेका सबै आरोपको वस्तुनिष्ट, तथ्यपरक र गम्भीर छानबिन गर्न सरकारी निकायलाई आग्रह गर्ने निर्णय गरेको उपमहासचिव प्रदीप ज्ञवालीले जानकारी दिए ।