नाङ्लाेबाट आत्मनिर्भर सुनौलो बस्तीका १० परिवार

धरान । नाङ्लाे बुनेर इटहरी उपमहानगरपालिका-३ सुनौलो बस्तीका १० परिवारले लोभलाग्दो आम्दानी गरिरहेका छन् ।

व्यावसायिक रूपमा नाङ्लो बुन्दै आएका १० राई परिवारका सदस्यले लोभलाग्दो आम्दानी गरिरहेका हुन् । उनीहरूकाे याे पुर्ख्याैली पेसा हाे ।

वसन्त राई दुई दशकदेखि नाङ्लो बुन्दै आएका छन् । भोजपुर होम्ताङका उनको व्यवसाय नै नाङ्लोको व्यापार हो । नाङ्लो बेचेर उनले घरव्यवहार चलाउँदै आएकाे उनलेे बताए ।

इटहरी सुनौलो बस्तीमा होम्ताङबाट आएका राई जातिको बाहुल्य छ । अधिकांश परिवारकाे  आम्दानीको स्रोत नै नाङ्लो बुन्ने हाे ।

एक पटकमा दुई सय वटासम्म बिक्रीका लागि नाङ्लो लैजाने गरेको तथा महिनामा रु २० देखि २५ हजारसम्मको नाङ्लो बिक्री गर्दै आएको उनले बताए ।

नाङ्लो विशेषगरी असोज–कात्तिकमा धेरै बिक्री हुने गरेको छ । यसको कमाइले घरखर्च पुगेको अर्का उद्यमी विक्रम राईले बताए । उनले ग्राहकको मागअनुसार नाङ्लो बनाउने गरेको बताए ।  धरान, विराटनगर, पथरीलगायत क्षेत्रका ग्राहकले नाङ्लो माग गर्दै आएका छन्  ।

नाङ्लो व्यवसायी कोपिला राईले बजारमा नाङ्लोको माग बढेकाे बताइन । पुर्ख्यौली पेसालाई निरन्तरता दिँदै आएका विक्रम राईले महिनामा दुई सयभन्दा बढी नाङ्लो बेच्ने गरेका छन् ।

नाङ्लो बनाउने बाँस पाउन गाह्रो भएको उनलेे बताए । एउटा सिङ्गो बाँसलाई दुई सयसम्म पर्छ । एउटा बाँसबाट १० वटासम्म नाङ्लो बनाउन सकिने बताए । ‘आफ्ना उत्पादन बोकेर गाउँ डुल्नु पर्दैन, घरमा नै आएर व्यापारीले लैजान्छन्,’ उनले भने,’ मेहनत अनुसारको कमाइ हुन्छ।’