विराटनगरमा पनि मोटरबोट

विराटनगर । विराटनगर महानगरपालिकाले मोटरबोट खरिद गरेको छ । यसरी खरिद गरेको मोटरबोटको केसलिया नदीमा परीक्षण गरिएको छ ।

बाढी र डुबानका समयमा उद्धारका लागि भन्दै महानगरले ९ लाख ७५ हजारमा मोटरबोट खरिद गरेर ल्याएको हो ।

मोटरबोट आएपछि वर्षाको समयमा बाढी र डुबानमा फसेका नागरिकलाई उद्धारमा सहज हुने मेयर नागेश कोइरालाले बताए । उनका अनुसार इन्जिन जडान नगरिकन पनि बोटलाई सञ्चालनमा ल्याउन सकिन्छ ।

विराटनगरको पूर्वमा सिघिया र पश्चिममा केसलिया खोला छ । वर्षामा सोही खोलाको बाढी बस्तीमा पस्ने समस्या छ । यसअघि बाढीमा फसेका नागरिकलाई उद्धारका लागि सशस्त्र प्रहरीसहित अन्य सुरक्षा निकायबाट मोटरबोट मगाउनुपर्ने बाध्यता थियो ।

मोटरबोटको परीक्षणपछि उपमेयर शिल्पा निराला कार्कीले बाढीको विपदमा परेका नागरिकलाई तत्कालै उद्धार गर्न सहज होस् भनेर मोटरबोट खरिद गरिएको बताइन् ।