कोशीमा विपद्का घटना : एक वर्षमा ७७ जनाको मृत्यु

विराटनगर । कोशी प्रदेशमा १ वर्षमा प्राकृतिक विपद्का घटनामा परी ७७ जनाको मृत्यु भएको छ । २ हजार ८ सयभन्दा बढी स्थानमा प्राकृतिक प्रकोपलगायतका विपद्का घटना भएको थियो ।

आर्थिक वर्ष २०८०/०८१ मा २ हजार ८ सय ६८ स्थानमा घटना भएको कोशी प्रदेश प्रहरी कार्यालय विराटनगरले जनाएको छ । १४ जिल्ला रहेको प्रदेशभित्र बाढी, पहिरो, चट्याङ, आगलागी, हावाहुरी र जंगली जनावरको आक्रमणसमेतका घटनामा ठूलो मानवीय तथा भौतिक क्षति भएको छ ।

सबैभन्दा धेरै १ हजार ७ सय ३१ स्थानमा आगलागी भएको प्रदेश प्रहरी प्रवक्ता एसएसपी भीमबहादुर दाहालले जानकारी दिए । उनका अनुसार ४ सय ९६ स्थानमा पहिरो, २ सय ५३ मा जंगली जनावरको आक्रमण, १ सय ८४ मा हावाहुरी, १ सय १७ मा बाढी र ८७ स्थानमा चट्याङका घटना भएका छन् । ती घटनामा ७७ जनाको मृत्यु भएको दाहालले बताए । घटनामा परेर २ सय ७७ जना घाइते भएको उनको भनाइ छ ।

सबैभन्दा धेरै मानिसको मृत्यु बाढीबाट भएको छ । बाढीले २२ जनाको मृत्यु र २४ जना घाइते भएको दाहालले बताए ।

आगलागीमा परेर २०, चट्याङ र जंगली जनावरको आक्रमणबाट १३/१३ तथा पहिरोका कारण ९ जनाको मृत्यु भएको छ । पहिरोमा परेर २०, चट्याङले लागेर ३६, आगलागीमा परी १ सय ३४, हावाहुरीका कारण ६ तथा जंगली जनावरको आक्रमणबाट ५७ जना घाइते भएको तथ्यांक प्रदेश प्रहरी कार्यालयले उपलब्ध गराएको छ ।

कार्यालयका अनुसार विभिन्न विपद्मा परेर ७ हजार ९ सय ८ वटा चौपाया मरेका छन् ।

विपद्का कारण २ हजार २ सय ७४ घर प्रभावित बनेको बताए । आगालागीका कारण ७ सय ५८, बाढीका कारण ६ सय ३८, पहिरोबाट ५ सय ८६, जंगली जनावरका कारण १ सय ७५, हावाहुरीबाट ८४ र चट्याङले ३३ वटा घर प्रभावित बनेका हुन् ।

विपद्का घटना हुँदा खोज तथा उद्धारका लागि ठूलो संख्यामा सुरक्षाकर्मी परिचालन गर्ने गरिएको जानकारी प्रदेश प्रहरी प्रमुख डीआईजी चन्द्रकुवेर खापुङले दिए । विभिन्न घटनामा १ वर्षको अवधिमा नेपाल प्रहरीका तर्फबाट १७ हजार ६ सय ८१ जना परिचालन गरिएको उनको भनाइ छ ।

डीआईजी खापुङले विपद्का बेला हुने क्षति न्यूनीकरणका लागि सबै निकायबीच समन्वयमै काम हुने गरेको बताए । उपलब्ध स्रोत, सधान र जनशक्तिलाई विपद्का समयमा प्रभावकारी ढंगले परिचालन गर्ने गरिएको उनको भनाइ छ ।