सिमलताला पहिरो : पाँच यात्रुकाे शव भेटियो, बस अझै भेटिएन

चितवन । शुक्रबार राति पहिरोका कारण दुई वटा बससँगै त्रिशूली खसेका यात्रु मध्ये पाँच जनाको शव फेला परेको छ । भेटिएका शवमध्ये तीनजनाको परिचय खुलेको छ ।  दुई वटा बस र यात्रुकाे अवस्था अझै अज्ञात छ ।

प्रहरीले निरन्तर बस र वेपत्ता यात्रुलाई खोजिरहेको छ ।

प्रमुख जिल्ला अधिकारी इन्द्रदेव यादवका अनुसार माडी नगपालिका–१ का २२ वर्षीय विकास परियार, सर्लाही बरहथवा नगरपालिका–३ का १९ वर्षीय रमितकुशर माझी र भारतको बिहार सीतामणि बर्गिनिया जमुहवाका २८ वर्षीय ऋषिपल साहको शव भेटिएको हो । दुईजनाको परिचय खुल्न बाँकी रहेको उनले बताए ।

काठमाडौँबाट गौरतर्फ गइरहेको बागमती प्रदेश ०३–००१ख २४९५ नम्बरको बस र वीरगञ्जबाट काठमाडौँतर्फ गइरहेको बागमती प्रदेश०३–००६ख १५१६ नम्बरको बस भरतपुर महानगरपालिका–२९ सिमलतालमा पहिरो खस्दा पहिरोसँगै त्रिशूलीमा खसेको थियो ।

गौरतर्फ गइरहेको बसमा ३८ जना र काठामाडौँतर्फ गइरहेको बसमा सवार २७ जना सवार थिए ।

बस नदीमा खस्दा ती मध्ये ३ जना पौडिएर बाँच्न सफल भए । पाँच जनाको शव फेला परेको छ । ५७ जना अझै बेपत्ता छन् ।

तेस्रो दिन आज पनि बस खसेको स्थानबाट झण्डै १ किलोमिटर तलबाट सशस्त्र प्रहरीको विपद् व्यवस्थापन तालिम शिक्षालय कुरिनटार र नेपाली सेनाको रसौलीस्थित विपद् व्यवस्थापन गणका उद्धारकर्मीले बस र यात्रुको खोजी गरिरहेका छन् ।