तेह्रथुममा पहिचान पक्षधरले मुख्यमन्त्रीलाई देखाए कालो झण्डा

विराटनगर । काेशी प्रदेशकाे नाम परिवर्तनकाे मागसहित आन्दाेलनरत पहिचान पक्षधरले प्रदेशका मुख्यमन्त्री हिक्मतकुमार कार्कीलाई कालो झण्डा देखाएका छन् । तेह्रथुमको बसन्तपुरबाट म्यालुङ जाने क्रममा बुधबार विहान जिरीखिम्ती बजारमा कालो झण्डा देखाएका हुन् ।

प्रदेशकाे नाम काेशी राखेपछि आन्दोलनरत पहिचान पक्षधरले २६ माघ २०८० मा सरकारसँगको सहमतिपछि आन्दोलनको स्वरुप परिवर्तन गरेको थियो । नेताहरुको यात्रामा अवरोध नगर्ने सहमति गरेको थियो । तर  मुख्यमन्त्री कार्कीकाे तेह्रथुम यात्राका क्रममा कालो झण्डा देखाएका हुन् । उनीहरुले मुख्यमन्त्री विरुद्ध नाराबाजी गरे ।

मुख्यमन्त्रीलाई कालो झण्डा देखाउने क्रममा प्रहरी र पहिचान पक्षधरबीच सामान्य धकेलाधकेल भएको थियो ।

जिल्ला प्रहरी कार्यालय तेह्रथुमका प्रमुख प्रहरी नायव उपरीक्षक रञ्जनकुमार दाहालका अनुसार १०–१२ जनाको समूहले मुख्यमन्त्रीलाई कालोझण्डा देखाउन खोजेको थियो । तर प्रहरीले रोकेको उनले बताए । ‘बसन्तपुरबाट म्याङलुङ आउने क्रममा जिरी बजारमा कालो झण्डा देखाउन खोजिएको थियो,’ उनले भने,‘ प्रहरीले रोक्यो ।’

१७ फागुन २०७९ मा हिक्मतकुमार कार्कीको नेतृत्वमा प्रदेशको नाम कोशी राखिएको थियो । प्रदेशसभामा मतदान गर्दा ९३ सांसद मध्ये ८२ सांसदले कोशीको पक्षमा मतदान गरेका थिए । प्रदेशको नाम कोशी राखेपछि पहिचान पक्षधर असन्तुष्ट छ ।

असारे विकास रोक्नुपर्छ  : मुख्यमन्त्री

मुख्यमन्त्री कार्कीले असारे विकासको प्रवृत्तिलाई रोक्नका आगामी आर्थिक वर्षबाट साउनदेखि नै काम गर्नुे बताएका छन् । बुधबार तेह्रथुमको म्याङलुङमा कर्मचारीसँगको छलफलका क्रममा उनले आगामी साउनदेखि नै कार्ययोजना बनाएर १ करोड माथिका योजना पहिलो चौमासिक मै कार्यान्वयनमा लैजाने बताएका हुन् ।

असारे विकासको प्रवृतिलाई रोक्नका लागि आवश्यक पर्ने विधि प्रक्रिया चाडै टुङ्गो लगाउने बताए । उनले तीन तहको स्थायी सरकार कर्मचारी सम्यन्त्रले सहकार्य, सहस्तित्व र समन्वयमा काम गर्न आग्रह गरे ।

पहाडबाट तराईमा बसाईसराईको क्रम बढेको बताउँदै उनले बसाईसराई रोक्नेगरी काम गर्नुपर्ने बताए । ‘पहाडमा सडक र बाटो पुग्न थालेको छ, तर मानिसहरू मधेश झर्न थाले । यो चिन्ताको विषय हो,’ उनले भने,‘ बसाईसराई रोक्न सबै लाग्नु पर्छ ।’