कोशी प्रदेशको बजेट : असारमा मात्रै ८ अर्ब १९ करोड खर्च

विराटनगर । कोशी प्रदेश सरकारले चालु आर्थिक वर्षको अन्तिम २५ दिनमा मात्रै ८ अर्ब १९ करोड ६९ लाख ६८ हजार ४४१ रुपैयाँ खर्च गरेकाे छ ।

हरेक आर्थिक वर्षकाे असार २५ गतेबाट बजेट खर्च खाता रोक्का हुन्छ । असार महिनाको २५ दिन सोमबार राति १२ बजेसम्म सरकारले ८ अर्ब १९ करोड ६९ लाख रुपैयाँ खर्च गरेको हो ।

प्रदेश लेखा नियन्त्रक कार्यालय कोशी प्रदेशको सूचना अधिकारी ऋषिकुमार खनालका अनुसार अन्तिम दिन सोमबार मात्रै दुई अर्ब ३० करोड ३५ लाख ८८ हजा ६ सय ८१ रुपैयाँ खर्च भएको छ । जेठ महिनामा मात्रै ४ अर्ब २९ करोड ६ लाख रुपैयाँ भएको थियो ।

प्रदेश सरकारले चालु आर्थिक वर्षका लागि सरकारले ३६ अर्ब ८१ करोड ९० लाख ७४ हजार रुपैयाँ बजेट विनियोजन गरेको थियो । जसमा २८ अर्ब ३६ करोड ७८ लाख ७६ हजार ६ सय ४४ रुपैयाँ मात्रै खर्च भएको छ ।

चालु आर्थिक वर्ष चालु तर्फ १५ अर्ब ९३ करोड ३५ लाख ६२ हजार , पूँजीगत तर्फ २० अर्ब ८७ करोड ५५ लाख १२ हजार रुपैयाँ विनियोजन भएको थियो ।

पूँजीगत तर्फ १६ अर्ब ३६ करोड ६ लाख ४४ हजार ७०६ रुपैयाँ मात्रै खर्च भएको छ । चालु तर्फ १२ अर्ब ७२ लाख ३१ हजार ९३८ रुपैयाँ खर्च भएको छ ।

सरकारले ल्याएको बजेट मध्ये ८ अर्ब ४५ करोड ११ लाख ९७ हजार ३५५६ रुपैयाँ खर्च भएन् ।