तीन लाख भारतीय नोटसहित विराटनगरबाट दुई जना पक्राउ

विराटनगर । भारतीय नोटसहित प्रहरीले विराटनगरकाे सीमावर्ती क्षेत्रबाट दुई जनालाई पक्राउ गरेको छ ।

पक्राउ पर्नेमा एक जना नेपाली र एक जना भारतीय छन् । छुट्टाछुट्टै स्थानबाट पक्राउ परेकाहरुकाे साथबाट भारतीय तीन लाख १७ हजार रूपैयाँ बरामद भएको छ ।

विराटनगर महानगरपालिका – ७ का २४ वर्षीय रोनक अग्रवाललाई प्रहरीले सोमबार साँझ ६ बजेतिर पक्राउ गरेको हो । भारतको जोगवनीबाट विराटनगर महानगरपालिका–१७ मटेरुवा हुँदै नेपाल प्रवेश गरेका अग्रवालाई सशस्त्र प्रहरी बल नेपाल प्रस्तावित सीमा सुरक्षा गुल्म रानीबाट खटिएको टोलीले पक्राउ गरेको हो ।

अग्रवालको साथबाट ५ सय दरका ४ सयवटा भारतीय नोट बरामद भएको सशस्त्र प्रहरी बल मोरङका निमित्त प्रमुख, डीएसपी लोकनाथ उप्रेतीले बताए । नेपालमा ५ सय र हजारका भारतीय नोट प्रतिबन्धित छ ।

सोमबार राति नै भारतीय नोटसहित नेपाल प्रवेश गरेका भारत भागलपुर सोनापट्टीका ३६ वर्षीय गौतमकुमार केडियालाई प्रहरीले पक्राउ गरेको छ । उनको साथकाट भारतीय एक लाख १७ हजार चार सय ४४ रूपैयाँ बरामद भएको प्रहरीले बताएको छ ।

सशस्त्रले पक्राउ परेका दुई जनालाई आवश्यक अनुसन्धानका लागि नेपाल प्रहरीको जिम्मा लगाएको छ । पक्राउ परेका अग्रवाल र केडियाको साथबाट बरामद भएको रकम अवैध हुण्डी कारोबारको हुनसक्ने प्रहरीले बताएको छ ।