गगन थापा भन्छन् :‘प्रचण्डको कारण कांग्रेस एमाले एक ठाउँमा’

विराटनगर । प्रधानमन्त्री पुष्पकमल दाहाल प्रचण्डको अस्थीर चरित्रका कारण देशमा नयाँ राजनीतिक समीकरण बनेको नेपाली कांग्रेस महामन्त्री गगन थापाले बताएका छन् ।

बिहीबार विराटनगर विमानस्थलमा सञ्चारकर्मीसँग कुरा गर्दै महामन्त्री थापाले प्रचण्डको अस्थीर कार्यशैलीका कारण कांग्रेस एमाले मिल्ने परिस्थीति बनेको बताएका हुन् ।

‘एमालेसँगको सरकारमा बसिसकेपछि पनि फेरि नयाँ खालको लसपस गर्नका लागि हातखुट्टा पसार्न थालिसके पछाडि अहिलेको दुर्घटना निम्त्याएको हो,’ उनले भने,‘ नेपालको राजनीतिमा प्रचण्ड यतिधेरै अस्थीर रहनुभयो कि उहाँसँग कसैको पनि विश्वास रहेन, त्यो कारणले अहिलेको परिस्थीति निर्माण भएको हो ।’

एमालेसँगको गठबन्धन हुँदा पनि प्रचण्डले दायाँबायाँ गर्न खोजिरहेको उनले बताए । ‘अहिलेको परिस्थीतिको सम्म्पूर्ण कारण भनेको वर्तमान प्रधानमन्त्री प्रचण्डको अस्थीरताको कारणले हो, नयाँ सरकार बनेपछि, गठबन्धन बनेपछि कांग्रेसका कसैलाई नयाँ गठबन्धन बनोस् भन्ने चाहाना थियो होला, मेरो चाहाना प्रतिपक्षमा रहनु नै उपयुक्त हुन्थ भन्ने थियो…,’ उनले भने,‘ तर सरकार बनेको २–४ महिना हुँदा नहुँदै गठबन्धन बन्थ्यो ? बन्दैनथ्यो प्रचण्डको यतिधेरै अस्थीर चरित्र व्यवहार नभएको भए ।’

दुई दलले आवश्यकता अनुसार संविधानको पुनरावलोकन गर्ने उनले बताए ।

‘अहिलेको संविधान कसैलाई देखाइदिनका लागि बनाएको होइन् । यसलाई जोगाउने जिम्मेवारी हाम्रो हो,’ उनले भने,’संघीय लोकतान्त्रिक गणतान्त्रत्मक ब्यवस्था, समावेशी लोकतन्त्र, समानुपातिक प्रतिनिधित्व, सबैको स्वतन्त्रतालाई थप सुदृढीकरण गर्न संविधान पुनरावलोकन गर्ने काँग्रेसको प्रस्ताव हो ।’

संविधान पुनरावलोकनका लागि कांग्रेस एमालेको मतले मात्र नपुग्ने बताउँदै उनले भने, ‘यसका लागि अरु दललाई पनि समेट्नुपर्ने हुन्छ ।’