कोशी मन्त्रीपरिषद् बैठक : सरकार छाड्ने तयारीमा रहेका मन्त्रीको नेतृत्वमा समिति

विराटनगर । सरकार छाड्ने तयारीमा रहेका माओवादी केन्द्रका मन्त्रीलाई समावेश गरेर कोशी प्रदेश मन्त्रीपरिषद् बैठकले तीन वटा समिति गठन गरेको छ ।

बिहीबार बसेको मन्त्रीपरिषद् बैठकले राजनीतिक तथा प्रशासनिक समिति, कानून न्याय तथा प्रदेश मामिला सम्बन्धी समिति र आर्थिक सामजिक तथा पूर्वाधार समिति गठन गर्ने निर्णय गरेको हो ।

आर्थिक सामाजिक तथा पूर्वाधार समितिको नेतृत्व माओवादी केन्द्रका मन्त्रीले गरेका छन् । तर केन्द्रमा एमाले र कांग्रेसको नयाँ गठबन्धन बनेपछि प्रदेश सरकारबाट माओवादी केन्द्र बाहिरिने तयारीमा छ । बाहिरिने तयारीमा रहेका मन्त्रीलाई मुख्यमन्त्री हिक्मतकुमार कार्कीले समिति संयोजक बनाएका हुन् ।

मन्त्रीपरिषदको बैठकले राजनीतिक तथा प्रशासनिक समितिको संयोजक आर्थिक मामिला तथा योजना मन्त्री रामबहादुर मगर तोकेको छ । स्वास्थ्य मन्त्री राजेन्द्र कार्की, सामाजिक विकासमन्त्री पाँचकर्ण राई र पर्यटन, वन तथा वातावरण मन्त्री नारायण बुर्जामगर सदस्य छन् । राजेन्द्र र नारायण माओवादी केन्द्रबाट मन्त्री बनेका हुन् ।

कानून न्याय तथा प्रदेश मामिला सम्बन्धी समितिको संयोजकमा आन्तरिक मामिला तथा कानून मन्त्री लिलाबल्लभ अधिकारी रहेका छन् । सदस्यमा भौतिक पूर्वाधार विकास मन्त्री गणेश उप्रेती, सामाजिक विकास मन्त्री पाँचकर्ण राई र सदस्य सचिवमा मुख्यमन्त्री कार्यालयका कानून तथा संवैधानिक मामिला महाशाखाका सचिव रहेका छन् । उप्रेती माओवादीबाट मन्त्री बनेका हुन् ।

स्वास्थ्य मन्त्री राजेन्द्र कार्कीको नेतृत्वमा आर्थिक सामजिक तथा पूर्वाधार समितिको गठन गरेको छ । सदस्यहरुमा आर्थिक मामिला तथा योजना मन्त्री रामबहादुर मगर, भौतिक पूर्वाधार विकास मन्त्री गणेश उप्रेती, खानेपानी सिंचाई तथा उर्जा मन्त्री एकराज कार्की र सदस्य सचिवमा मुख्यमन्त्री कार्यालयका शासकीय सुधार महाशाखाका सचिव छन् ।  समिति संयोजक कार्की र सदस्य उप्रेती माओवादी केन्द्रका हुन् ।

केन्द्रमा सरकार फेरिएपछि प्रदेशमा पनि माओवादी केन्द्र प्रतिपक्षमा बस्दैछ । प्रदेश सरकारबाट बाहिरिने विषयमा केन्द्रको निर्देशन कुरिररहेको माओवादी केन्द्र संसदीय दलका नेता इन्द्रबहादुर आङ्बोले बताए ।

‘केन्द्रमा प्रतिपक्षमा बसेपछि प्रदेशमा पनि स्वभाविक हिसाबले प्रतिपक्षमा बस्छौं,’ उनले भने,‘ केन्द्रको निर्देशनपछि बाहिरिन्छौं,अहिले माथिबाट केही आएको छैन ।’ सरकार छाड्ने विषयमा मुख्यमन्त्री हिक्मतकुमार कार्कीलाई जानकारी गराइरसहेको उनले बताए ।

नेकपा एमाले प्रमुख सचेतक रेवतीरमण भण्डारीले केन्द्रमा राष्ट्रीय सहमतिको सरकार निर्माण गर्ने भनिएका कारण प्रदेशमा एमालेले माओवादीका मन्त्रीलाई नअटाउने बताए । प्रादेशिक सहमतिको सरकार निर्माण गर्नका लागि पहल गर्ने उनले बताए ।