रेशमसँगको विवादपछि रञ्जिताको जिम्मेवारी खोसियो

काठमाडौँ । नागरिक उन्मुक्ति पार्ट अध्यक्ष रञ्जिता श्रेष्ठलाई बहुमत सांसदले संसदीय दलको नेताबाट हटाएका छन् । पार्टीका संरक्षक रेशम चौधरीसँगको विवादका कारण श्रेष्ठलाई बहुमत सांसदले दलको नेताबाट हटाएका हुन् ।

बहुमत प्रतिनिधिसभा सदस्यहरूको बैठकले श्रेष्ठलाई जिम्मेवारीमुक्त गरेर प्रमुख सचेतक गंगाराम चौधरीलाई दलको नेताको जिम्मेवारी दिएको छ । पार्टीका संरक्षक लालवीर चौधरीलाई प्रमुख सचेतकको जिम्मेवारी दिइएको छ । बर्दिया– २ बाट निर्वाचित लालवीर चौधरी रेशम चौधरीका बुवा हुन् ।

संसदीय दलको नेता परिवर्तन गरेको औपचारिक जानकारी संसद सचिवालयलाई गराउन बाँकी रहेको नाउपाले जनाएको छ ।

गत फागुनमा केन्द्रमा राजनीतिक समीकरण फेरिएपछि नागरिक उन्मुक्ति पार्टीभित्र सरकारमा सहभागिताको विषयलाई लिएर अध्यक्ष श्रेष्ठ र संरक्षक रेशम चौधरीबीच विवाद थियो । उनीहरु श्रीमान श्रीमती हुन् ।

दल भित्र विवाद भएपछि श्रेष्ठले प्रधानमन्त्री पुष्पकमल दाहाल प्रचण्डलाई विश्वासको मत दिन ह्वीप जारी गरेकी थिइन् ।

विवादकै कारण सुदूरपश्चिम सरकारमा पनि सांसद विभाजित छन् । रञ्जिता पक्षका कैलाश चौधरी र टीका थापा सरकारमा सहभागी छन् । रेशम चौधरी पक्षका पाँच सांसद भने प्रतिपक्षी बेन्चमा बसेका छन् ।