प्रदेशलाई अधिकार दिन संघ तयार भएन : मुख्यमन्त्री कार्की

विराटनगर । कोशी प्रदेशका मुख्यमन्त्री हिक्मतकुमार कार्कीले संघीय सरकार प्रदेशहरुलाई अधिकार दिन तयार नभएको बताएका छन् । आइतबार प्रदेश तहमा निर्मित कानुनको अध्ययन तथा समिक्षा प्रतिवेदन प्रस्तुतिकरण कार्यक्रमलाई संम्बोधन गर्दै मुख्यमन्त्री कार्कीले अधिकार दिन संघ तयार नभएको बताएका हुन् ।

प्रदेशमा दिनुपर्ने सबैखालका अधिकार दिन संघीय सरकारले अंकुश लगाएको उनले बताए । ‘एकल अधिकार दिनसमेत संघीय सरकार विभिन्न अंकुश लगाएर बसेको छ,’ उनले भने,‘ अधिकार दिनु हुँदैन भन्ने मनसाय देखिन्छ।’

मुख्यमन्त्रीको भेला समेत गर्न रोक लागाएर प्रदेशमाथि अन्याय गरिरहेको उनले बताए । केन्द्रिकृत मानसिकताका कारण प्रदेश सरकारप्रति प्रहार भइरहेको उनको भनाई छ ।

संविधान र कानुनले दिएका वित्तीय बाडफाँड जस्तो विषयमा समेत विभिन्न अड्चन झिकेर रोक्ने काम भएको र श्रोत नदिन संघीय सरकार लागेको उनको गुनासो छ ।

‘संघले हामीलाई खटाई खटाई खान दिएजस्तो गर्छ,’ उनले भने,‘यो तोडेर अगाडि नबढेसम्म प्रदेशका कानुन कार्यान्वयन गर्न र प्रदेशलाई समृद्ध बनाउन सकिदैन ।’
प्रदेशकाकानुनहरु जनतामाझ नपुगेको गुनासोलाई सम्बोधन गर्ने उनले बताए ।