बस्ती पस्यो केसलीया, सिंघिया र बास्ता खोला, एक हजार बढी परिवार प्रभावित

विराटनगर । निरन्तरको वर्षासँगै सिंघिया र केसलीया खोलामा आएको बाढी बस्तीमा पसेको छ । खोलाको बाढी बस्तीमा पस्दा एक हजार भन्दाबढी परिवार प्रभावित भएका छन् । केसलीया खोलामा आएको बाढी बस्तीमा पस्दा, बखरी दरैयालगायत पश्चिमि क्षेत्रका बस्ती डुबानमा परेका छन् ।

बास्ता खोलाको बाढी विराटनगर महानगरपालिका– ६ स्थित खोला आसपासका बस्तीमा पस्दा करिब ५ सय घरमा पसेको वडा नम्बर ६ का अध्यक्ष हरिशचन्द्र सहनीले जानकारी दिए ।

वडा नम्बर १२ को बस्तीमा केसलिया खोलाको बाढी पसेको छ । वडा अध्यक्ष हिरालाल कामतका अनुसार खोला किनारका बस्ती डुबानमा परेका छन् । सिंघिया खोलामा आएको बाढीका कारण विराटनगर– ८ सुकुम्बासी टोलका १० परिवार विस्थापित भएका छन् । उनीहरुलाई स्थानीय जनप्रतिनिधि र प्रहरीले सुरक्षित स्थानमा सारेका छन् । पानीको बहाव बढेपछि सतर्कता अपनाउन स्थानीय प्रशासनले आग्रह गरेको छ ।

मंगलबार रातिदेखि परेको पानी नरोकिएका कारण विराटनगरका विद्यालय बन्द भएका छन् ।

विराटनगर महानगरका प्रवक्ता तथा विराटनगर–५ का वडाध्यक्ष सन्तोष न्यौपानेका अनुसार वर्षाका कारण विराटनगरका अधिकांश क्षेत्र डुबानमा परेका छन् । प्रभावितलाई उद्धार गरेर राख्नका लागि विद्यालय र सामुदायिक भवनलाई ‘सेल्टर’का रूपमा तयारी अवस्थामा राखिएको न्यौपानेले दिए । विराटनगरमा ६० वटा ‘सेल्टर’ तयारी अवस्थामा राखिएको उनले बताए ।