विराटनगरको नीति: विद्यालयमा एक दिन बुक फ्री, ज्येष्ठ नागरिकलाई घरदैलोमा स्वास्थ्य सेवा

विराटनगर । विराटनगर महानगरपालिकाले वडाहरुलाई दुई करोड भन्दा माथिका योजना छनोट गरी बजेट विनियोजन गरेको छ । महानगरपालिकाले जनसंख्या र क्षेत्रफलका आधारमा वडालाई न्यूनतम दुई करोडदेखि अधिकत २ करोड ६४ लाख बजेट उपलब्ध गराएको थियो । १९ वटा वडा रहेको महानगरका वडाले पठाएको योजनाका आधारमा आर्थिक वर्ष २०८१–८२ का लागि ३ अर्ब ४९ करोड ९८ लाख ८६ हजारको बजेट ल्याएको हो ।

नयाँ कार्यक्रम समावेश नगरिएको बजेटमा महानगरपालिकाले ७५ वर्षीय ज्येष्ठ नागरिकलाई घरदैलोमा पुगेर निशुल्क स्वास्थ्य परीक्षण सेवा दिने नीति लिएको छ । यसअघि ८० वर्षका ज्येष्ठ नागरिकलाई मात्रै घरदैलोमा स्वास्थ्य जाँच गरिरहेको थियो । महानगरपालिकाले मोतियाविन्दुमुक्त महानगर बनाउने अभियान पनि सञ्चालन गरेको छ ।

महानगरपालिकाले आगामी आर्थिक वर्षका लागि हरेक शुक्रबार पुस्तकरहित दिनको रुपमा मनाउन ‘खेल्दै सिक्दै कार्यक्रम’ सञ्चालन गर्ने भएको छ । काठमाडौँ महानगरपालिकाले हरेक शुक्रबार बु फ्री डे बनाउने घोषणा गरेको थियो । विराटनगरले पनि सोही नियम लागु गर्ने भएको हो ।

शैक्षिक विकास तर्फ महानगरपालिकाले ‘प्रदेश राजधानी साझा सहर, गुणस्तरीय शिक्षाको हव विराटनगर’ अभियान सुरु गरेको छ । यसका लागि भौतिक तथा शैक्षिक पूर्वाधार विकास गर्ने महानगरले जनाएको छ ।
महानगरपालिकाले ‘स्कुल भित्र सबै नानी, धारो खोल्दा शुद्ध पानी’ को नारासहित सामुदायीक विद्यालयहरुमा फिल्टर प्लान्टसहित शुद्ध पिउने पानीको व्यवस्थापन गर्ने नीति लिएको छ ।

विराटनगरले ‘मेयर इन्जिनियरिङ छात्रवृत्ति कार्यक्रम अन्तरगत महानगर बहुप्राविधिक शिक्षालयमा २५ जना लक्षित वर्गका विद्यार्थीलाई छात्रवृत्तिमा पिप्लोमा तहको प्राविधिक धार पढाउने भएको छ । उपमेयर किशोरी आत्मरक्षा कार्यक्रमलाई सञ्चालन गर्ने नीति लिएको महानगरले विद्यालयलाई खेलाडी उत्पादन गर्ने कारखानाको रुपमा विकास गर्ने नीति बनाएको छ ।

विराटनगर महानगरपालिकाले वडा नम्बर ४,५,६, ११,१२ र १३ नम्बर वडामा पर्ने सुनसरी मोरङ सिचाई आयोजनाको नहरको पश्चिम पट्टीको बाटोलाई वकिङ स्ट्रीट रुपमा विकास गर्ने घोषणा गरेको छ । विराटनगरको दक्षिणी वडाहरुमा वर्षाको पानी निकासका लागि आइसिपी रोड हुँदै रेल्वे ट्याकबाट सिंघियाखोलासम्मको डिपिआर बनाउने भएको छ ।

विराट दरबार क्षेत्रलाई पर्यटकिय क्षेत्रको रुपमा विकास गर्ने महानगरको नीति छ । बजेटमा नगरबस सञ्चालन, स्मार्ट सिटी निर्माण, अन्तरराष्ट्र्रीय स्तरको रंगशाला निर्माण र फोहोरमैला व्यवस्थापनको काम अघि बढाउने छ । विराटनगरको क्षेत्रगत गुरुयोजना बनाई प्रोजेक्ट बनाउने महानगरको योजना छ ।
सडकमा ट्राफिक लाइट जडान गर्ने, प्रादेशिक बसपार्क, रिङरोड निर्माण, बाइपास सडक निर्माणका लागि निजी क्षेत्रसँग साझेदारी गर्ने महानगरको नीति छ । सडक सुरक्षाका लागि महानगरले रिङरोड कोशी राजमार्ग र वाइपास सडक बाहेक अन्य सडकमा ठूला सवारी साधानबाट हुने ढुवानी रोक्ने बताएको छ भने भौतिक संरचनाको मर्मत सम्भारका लागि मोबाइल इन्फास्टक्चर एम्बुलेन्स सञ्चालन गर्ने नीति महानगरको छ ।