जीवन विकास सामुदायिक अस्पतालमा छुट्टै आँखा उपचार विभाग सञ्चालनमा

विराटनगर । जीवन विकास सामुदायिक अस्पताल तथा टेक्निकल एजुकेशन फाउन्डेशनले अत्याधुनिक सुविधासहितको छुट्टै ‘आँखा विभाग’ सञ्चालनमा ल्याएको छ ।

अस्पतालमा बढ्दो बिरामीको चाप र गुणस्तरीय नेत्र उपचारको आवश्यकतालाई मध्यनजर गर्दै विश्व दृष्टि दिवसको अवसर पारेर बिहीबारबाट नवनिर्मित भवन मार्फत सेवा सुरु गरिएको हो ।

आम नागरिकलाई सुलभदरमा  गुणस्तरीय स्वास्थ्य सेवा उपलब्ध गराउने उद्देश्यले निर्माण गरिएकाे आँखा विभागको जीवन विकास सामुदायिक अस्पताल तथा टेक्निकल एजुकेशन फाउन्डेशनका अध्यक्ष योगेन्द्र मण्डलले उद्घाटन गरे ।

१३ करोड रुपैयाँको लागतमा निर्मित अत्याधुनिक विभागबाट दक्ष चिकित्सकहरूको टोलीले सबै प्रकारका आँखासम्बन्धी रोगको विशेषज्ञ उपचार सेवा प्रवाह गर्नेछ । नयाँ भवनबाट आँखासम्बन्धी विभिन्न जटिल तथा सामान्य समस्याहरूको सम्पूर्ण परीक्षण र उपचार सुविधा एकै स्थानबाट उपलब्ध हुनेछ ।

अस्पतालका संयोजक तेजस्वी मण्डलका अनुसार सबै प्रकारका उपचार सुलभ दरमा एकै स्थानमा उपलब्ध गराउने लक्ष्यसहित छुट्टै विभाग स्थापना गरिएकाे हाे । आँखाको उपचारका लागि आउने बिरामीहरूले अस्पतालका अन्य विभागका चिकित्सकसँग परामर्श गर्नु परे ओपीडी शुल्क नलाग्ने उनले जानकारी दिए ।