सुनसरीमा २ हजार ५६६ किलाे गाँजा बरामद

विराटनगर । सुनसरीको इनरुवामा काउली (बन्दाकोपी) बोकेको ट्रकबाट २५ सय ६६ किलो गाँजा बरामद भएकाे छ । सुनसरी प्रहरीका निमित्त सूचना अधिकारी इन्स्पेक्टर हेमराज ओलीका अनुसार २ हजार ५ सय ६६ किलो ५ सय ६० ग्राम गाँजा बरामद भएकाे हाे ।

ट्रकमा लोड गरिएको बन्दाकोपीको बीचमा लुकाएर लैजाँदै गरिएको गाँजा बरामद गरेर ट्रक चालक र सहचालकलाई पक्राउ गरिएको जानकारी उनले दिए ।

इनरुवा नगरपालिका–३ स्थित सखुवागाछी चोकमा चेकजाँच गर्ने क्रममा ना ७ ख १८२५ नम्बरको ट्रकबाट आइतबार राति ११ः५० बजेतिर ८३ वटा बोरामा प्याक गरिएको अवस्थामा गाँजा बरामद भएको इन्स्पेक्टर ओलीले बताए । चालक धनकुटाको सहिदभूमि गाउँपालिका–२ का ३३ वर्षीय राजु राई र सहचालक सहिदभूमि गाउँपालिका–२ का १८ वर्षीय सदीप राईलाई पक्राउ परेका छन् ।