प्रमुख प्रशासकीय अधिकृत बिदा बस्दा विराटनगर महानगरपालिकाकाे भुक्तानी राेकियाे

विराटनगर । प्रमुख प्रशासकीय अधिकृत बिदामा बस्दा विराटनगर महानगरपालिकामा ठेकेदारकाे भुक्तानी राेकिएकाे छ । आर्थिक वर्ष सकिएको दुई महिना बितिसक्दा पनि विराटनगर महानगरपालिकामा काम सम्पन्न गरेका निर्माण व्यवसायी, उपभोक्ता समिति र परामर्शदाताले करोडौँ रुपैयाँ भुक्तानी नपाएका हुन् ।

महानगरको अभिलेखअनुसार अघिल्लो आर्थिक वर्षबाट दायित्व सरेका तथा बहुवर्षीय योजनासहित करिब ६० करोड रुपैयाँभन्दा बढी भुक्तानी चालु आर्थिक वर्षमा धकेलिएको छ । भुक्तानीको चाप बढिरहेका बेला महानगरका प्रमुख प्रशासकीय अधिकृत विजयकुमार शर्मा भने कार्यालयमा नियमित उपस्थित नभएको जनप्रतिनिधि तथा महानगर स्रोतको भनाइ छ । शर्मा असार २ गते प्रमुख प्रशासकीय अधिकृतका रूपमा महानगरमा हाजिर भएका थिए । त्यसयता साउन र भदौका ६२ दिनमा उनी २६ दिनमात्रै कार्यालयमा उपस्थित भएको महानगर स्राेत बताउँछ ।

प्रमुख प्रशासकीय अधिकृतको नियमित अनुपस्थितिले भुक्तानी प्रक्रिया, प्रशासनिक समन्वय र सेवा प्रवाहमा असर परेको जनप्रतिनिधिहरू बताउँछन् । विराटनगर–७ का वडाध्यक्ष मधुबाबु तिवारीका अनुसार निर्माण व्यवसायीले काम सम्पन्न गरे पनि भुक्तानी नपाउँदा वडाध्यक्षहरूसमेत दबाबमा परिरहेका छन् ।

‘उहाँ कार्यालयमा नबस्दा हामीलाई समस्या भएको छ । निर्माण व्यवसायीको भुक्तानी नदिएको कारण घर घेर्न आउने समय भइसक्यो,’ तिवारीले भने, ‘केही न केही समस्या परेको छ । सेवाग्राहीहरूले गुनासो पनि गर्न थाल्नु भयो । सार्वजनिक बिदा नभएको दिनचाहिँ उहाँ कार्यालयमा बसिदिए हुन्थ्यो ।’

आर्थिक वर्षको अन्तिम समयमा पुरानो प्रमुख प्रशासकीय अधिकृतबाट नयाँ अधिकृतमा जिम्मेवारी हस्तान्तरण भएको र नयाँ आर्थिक वर्षको बजेट आउनुभन्दा करिब १५ दिनअघि नयाँ प्रमुख प्रशासकीय अधिकृत आएको अवस्थाले पनि प्रशासनिक तालमेलमा समस्या भएको एक जनप्रतिनिधिले बताए ।

शर्मा बिदामा रहँदा निमित्त प्रमुख प्रशासकीय अधिकृतको जिम्मेवारी रामप्रसाद ढुंगेलले सम्हाल्दै आएका छन् । प्रमुख प्रशासकीय अधिकृतको फोन शर्मासँगै भए पनि अधिकांश फोन ढुंगेलतर्फ फरवार्ड हुने गरेको स्रोतले जनाएको छ । शर्मासँग प्रतिक्रिया लिन फोन गर्दा पनि ढुंगेलले नै फोन उठाएका थिए ।

बुधबार बसेको कार्यपालिका बैठकमा समेत शर्मा उपस्थित भएनन् । बैठकमा आउने बताएका शर्मा अन्तिम समयमा बिरामी भएको जानकारी गराएर अनुपस्थित भएको स्रोतले बताएको छ ।