राजविराजमा फुटपाथमै सुत्केरी : अस्पतालले भर्ना लिन अस्वीकार गरेको आरोप

विराटनगर । राजविराजस्थित गजेन्द्रनारायण सिंह सगरमाथा अस्पतालले भर्ना नलिएपछि स्थानीय बबिता पासवानले फुटपाथमै बच्चा जन्माएको घटना सार्वजनिक भएको छ । अस्पतालले भर्ना गर्न नमानेपछि उनले फुटपाथमै बच्चा जन्माएकी हुन् ।

बुधबार बिहानकाे राति सुत्केरी व्यथा लागेपछि बबिता श्रीमान् हरेराम पासवान र दुई महिलासहित अस्पताल पुगेकी थिइन् । तर अल्ट्रासाउन्ड र रगत–पिसाब परीक्षणका लागि लाग्ने २५०० रुपैयाँ तिर्न नसक्ने भएपछि अस्पतालले भर्ना लिन इन्कार गरेको पीडित पक्षको दाबी छ ।

त्यसपछि बाध्य भएर उनी अस्पताल बाहिर रहेकाे औषधि पसल अगाडि पुगिन्, जहाँ केहीबेरमै प्रसव वेदना बढ्यो र त्यहीं फुटपाथमै छोरा जन्माइन् । सालनालसहित शिशु बोकेर अस्पताल पुग्दा पनि भर्ना नलिएको र धम्क्याएर निकालिएको बबिताको गुनासाे छ ।

अस्पतालका मेडिकल सुपरिटेन्डेन्ट डा. रञ्जितकुमार झाले घटनाबारे छानबिन समिति गठन गर्ने बताएका छन् ।