बेत्रावतीमा एउटै घरमा भेटियाे २४ जनाकाे शव

काठमाडौं । भाेटेकाेशी बाढीपछी खोजीका क्रममा नुवाकोटको बेत्रावतीमा एउटै घरभित्र २४ वटा शव फेला परेका छन् ।

विदुर नगरपालिका–१० स्थित बेत्रावतीमा सोमबार खोजी गर्ने क्रममा एउटा घरभित्र ठूलो संख्यामा शव भेटिएको नुवाकोटका प्रहरी प्रमुख एसपी विपिन रेग्मीले जानकारी दिए ।

एकै घरमा यति ठूलो संख्यामा शव भेटिएपछि उक्त घरमा को–को थिए भन्ने विषयमा समेत प्रहरीले अनुसन्धान थालेको छ । एसपी रेग्मीका अनुसार उक्त घरको वास्तविक पहिचान र त्यहाँ मानिसहरू कसरी जम्मा भएका थिए भन्ने बारेमा अहिले नै यकिन भइसकेको छैन । घर होटल वा गेस्ट हाउस हुन सक्ने देखिए पनि त्यसको पुष्टि हुन बाँकी रहेको प्रहरीले जनाएको छ ।

भदौ १० गते भोटेकोशी नदीमा आएको बाढीले नुवाकोटसहित आसपासका क्षेत्रमा ठूलो जनधनको क्षति गरेको छ । भदौ १० गते आएको बाढीपछि विभिन्न प्रभावित जिल्लामा जारी खोज तथा उद्धार अभियानका क्रममा हालसम्म ९ सय ८७ जनाको शव फेला परेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ ।

प्राधिकरणका अनुसार हाल ३ हजार ९ सय १६ जनासँग सम्पर्क स्थापित हुन सकेको छैन ।

सम्पर्कविहीन हुनेमा सुरक्षाकर्मी, सरकारी कर्मचारी, स्थानीय बासिन्दा, जलविद्युत् आयोजनामा कार्यरत कर्मचारी तथा विदेशी नागरिकसमेत छन् । नेपाल प्रहरीका २५, नेपाली सेनाका ४५ र सशस्त्र प्रहरी बल नेपालका १३ जना अझै सम्पर्कमा आएका छैनन् । त्यस्तै भन्सार कार्यालयका १५, अध्यागमन कार्यालयका तीन जना पनि सम्पर्कविहीन रहेको प्राधिकरणले जनाएको छ ।

जिल्लागत विवरणअनुसार नुवाकोटमा सबैभन्दा धेरै १ हजार ५ सय ५८ जना सम्पर्कविहीन छन्। रसुवामा करिब ८ सय ६५ जना सम्पर्कविहीन छन् । विभिन्न जलविद्युत् आयोजनामा कार्यरत ६ सय ३९ जनाको समेत अवस्था पत्ता लाग्न सकेको छैन ।