माइखोला–राजदुवाली खण्डमा चल्न थाले साना सवारी

विराटनगर । करिब दुई महिनादेखि अवरुद्ध अवरूद्ध मेची राजमार्गकाे इलाम माइखोला–राजदुवाली सडकखण्डमा सवारी चल्न थालेकाे छ । सोमबार बिहानबाट साना सवारी साधन चल्न थालेकाे हाे ।

लगातारको वर्षापछि असार २५  गते सडक भासिएपछि यातायात अवरुद्ध थियाे । ५१ दिनपछि आंशिक रूपमा सञ्चालनमा आएको हो ।

सडक डिभिजन कार्यालय इलामका अनुसार असार २९ गते सडक थप भासिएपछि मोटरसाइकल सहित सबै प्रकारका सवारी साधन सञ्चालनमा पूर्ण रोक लगाइएको थियो ।

पहिलो चरणमा साना तथा हलुका सवारी साधन मात्र सञ्चालन गर्न दिइएको सडक डिभिजन कार्यालय इलामले जानकारी दिएको छ।

सडकमा नाली, टेवा पर्खाल र डिवाटरिङ वेल निर्माण लगायतका पुनर्स्थापना कार्य अझै जारी रहेकाले ठूला तथा मालबाहक सवारी साधन भने सञ्चालन गर्न दिइएको छैन ।

मुख्य राजमार्ग लामो समय ठप्प हुँदा इलाम सहित पाँचथर र ताप्लेजुङको झापासहित तराईका जिल्लासँगको सीधा यातायात सम्पर्क टुटेको थियो । साना गाडी चल्न थालेसँगै पूर्वी पहाडी जिल्लाका यात्रु र स्थानीयलाई राहत पुगेको छ ।