रगत अभाव टार्न जीवन विकासको अग्रसरता, रक्तदानबाट ५४ पिन्ट संकलन

विराटनगर । रगतको अभावलाई मध्यनजर गर्दै जीवन विकास सामुदायिक अस्पतालले आयाेजना गरेकाे रक्तदान कार्यक्रममा ५४ पिन्ट रगत संकलन भएको छ । शुक्रबार मोरङको कटहरीस्थित जीवन विकास सामुदायिक अस्पताल परिसरमा आयोजित कार्यक्रममा ५४ पिन्ट रगत संकलन भएको हाे ।

अस्पतालले आयाेजना गरेकाे रक्तदान कार्यक्रममा जीवन विकास लघुवित्त वित्तीय संस्थाका कर्मचारी, अस्पतालका स्वास्थ्यकर्मी,कर्मचारी, सेवाग्राहीलगायतले उत्साहजनक रूपमा रक्तदान गरेका थिए ।

पछिल्लो समय अस्पतालहरूमा रगतको माग बढेको तर आपूर्तिमा कमी देखिएकाले बिरामीहरूलाई सहज होस् भन्ने उद्देश्यले अस्पतालसँगकाे सहकार्यमा रक्तदान कार्यक्रम आयोजना गरिएको जीवन विकास लघुवित्त वित्तीय संस्थाका प्रमुख कार्यकारी अधिकृत संजय कुमार मण्डलले बताए ।

‘अहिलेको समयमा रगतको अभावका कारण कतिपय बिरामीले समस्या भोग्नुपरिरहेको छ,’मण्डलले भने, ‘हाम्रा कर्मचारीहरूको यो सानो योगदानले कसैको ज्यान बचाउन मद्दत पुग्ने विश्वास लिएका छौँ ।’

रक्तदान कार्यक्रमका लागि अस्पतालमा रहेकाे ब्लड बैंकले प्राविधिक सहयोग गरेकाे थियाे ।