कप्तानगन्ज घटनाकाे विराेधमा आज पनि प्रदर्शन, राजमार्ग अवरुद्ध

विराटनगर । सुनसरीको देवानगन्जस्थित कप्तानगन्जमा आइतबार दुई समूहबीचको झडपमा प्रहरीको गोली लागि एक जनाको मृत्यु भएको घटनालाई लिएर आज (मंगलबार) पनि प्रदर्शन जारी छ ।

प्रदर्शनकारीले पूर्वपश्चिम राजमार्गको सुनसरीकाे पकलीदेखि कोशी ब्यारेजसम्म ठाउँ-ठाउँमा टायर बालेर सडक अवरुद्ध गरेका छन्, जसका कारण यातायात सेवा ठप्प भएको छ ।

विराटनगरको बजार क्षेत्रमा पनि युवाहरूले सरकारविरुद्ध प्रदर्शन गरिरहेका छन् ।

स्थिति थप तनावपूर्ण हुन नदिन स्थानीय प्रशासनले इटहरीबाट पश्चिम जाने सवारी साधनलाई रोकेको छ ।

शान्ति सुरक्षा कायम गर्न स्थानीय प्रशासनले सुनसरीका हरिनगरा, भुटाहा, कप्तानगन्ज, घुस्की र देवानगन्ज कर्फ्यू आदेश जारी गरेको छ । कर्फ्यू क्षेत्रमा भेला, जुलुस र प्रदर्शन गर्न प्रतिबन्ध लगाइएको छ ।