पहिरो र वर्षाको जोखिम : काठमाडौं उपत्यकाबाट बाहिरिने सवारी राेकिए

काठमाडौं । अविरल वर्षासँगै पहिरोको जोखिम बढेपछि काठमाडौं उपत्यकाबाट बाहिरिने सवारीलाई राेकिएकाे छ ।

नागढुंगा, साँगा, फर्पिङ र बीपी राजमार्ग हुँदै चल्ने लामो दूरीका सवारी साधनलाई बसपार्कमै रोकिएको हाे ।

उपत्यका ट्राफिक प्रहरी कार्यालयका अनुसार पृथ्वी राजमार्गको चितवन खण्ड (केराबारी र तुइनखोला), बीपी राजमार्गको मंगलटार र कान्तिपथका विभिन्न ठाउँमा पहिरो खसेकाले यातायात ठप्प भएको छ । वर्षाका कारण हेटौंडा जोड्ने फाखेल-सिस्नेरी सडक पनि अवरुद्ध छ ।

सुरक्षाका कारण हिजो रातभर र आज बिहान पनि सवारी साधन सञ्चालनमा रोक लगाइएको प्रहरीले जनाएको छ । जोखिमको अवस्था विश्लेषण गरेपछि मात्रै गाडीहरू छोडिने छ । चितवन प्रशासनले पनि अर्को सूचना नआएसम्मका लागि सवारी आवागमन बन्द रहने जानकारी दिएको छ ।