विद्युत मर्मत गर्न गएका दुई कर्मचारीको दुर्घटनामा मृत्यु

विराटनगर । सुनसरीको इटहरीमा सोमबार राति नेपाल विद्युत प्राधिकरण धरानको स्कोरपिओ गाडी दुर्घटना हुँदा चालकसहित दुई जनाको मृत्यु भएको छ । दुर्घटनामा एक जना कर्मचारी घाइते भएका छन् ।

मृतक र घाइते नेपाल विद्युत प्राधिकरण धरानमा कार्यरत थिए । प्राधिकरण धरानका प्रमुख हरिराम पोखरेलका अनुसार राति ९ः५४ बजेतिर दुहबी–धरान ३३ केभी लाइनमा समस्या आएपछि पेट्रोलिङ तथा मर्मतका लागि कर्मचारी परिचालन गरिएको थियो ।

‘लाइन पेट्रोलिङ तथा मर्मतका लागि परिचालन गरिएका कर्मचारीहरु चढेको गाडी दुर्घटना परेको हो । दुर्घटनामा ठूलो क्षति भएको छ । दुई जनाको मृत्यु भयो । एक जना घाइते उपचाररत हुनुहुन्छ,’ पोखरेलले भने ।

कोशी लोकमार्गअन्तर्गत इटहरी उपमहानगरपालिका–२० सेउती पुलबाट करिब २ सय मिटर दक्षिणमा अर्थात् तरहरातर्फ राति ११ः४० बजेतिर दुर्घटना भएको हो । इलाका प्रहरी कार्यालय इटहरीका डीएसपी सुवास हमालका अनुसार धरानबाट इटहरीतर्फ आउँदै गरेको विद्युत प्राधिकरणको बा १ ञा १६५१ नम्बरको स्कोरपिओ आफैं अनियन्त्रित भएर दुर्घटनामा परेको प्रारम्भिक अनुसन्धानबाट खुलेको छ ।

दुर्घटनामा परेर विद्युत प्राधिकरण धरानमा कार्यरत स्कोरपिओ चालक धरान उपमहानगरपालिका–१३ का अन्दाजी ३३ वर्षीय बिर्खबहादुर राई र धरान–१६ का अन्दाजी ४९ वर्षीय सुमन अचार्यको मृत्यु भएको प्रहरीले जनाएको छ । राई करारका कर्मचारी हुन् । हेल्पर पदमा कार्यरत आचार्य प्राधिकरणका स्थायी कर्मचारी हुन् । दुर्घटनामा परेर गम्भीर घाइते भएका दुवै जनालाई तत्काल उद्धार गरी एम्बुलेन्समा राखेर उपचारका धरानस्थित बीपी कोइराला स्वास्थ्य विज्ञान प्रतिष्ठान धरान पुर्याउनसाथ चिकित्सकले राति १२ः४५ बजेतिर मृत घोषणा गरेका थिए ।

दुर्घटनामा  घाइते प्राधिकरणकै कर्मचारी धरान–२० का अन्दाजी ३२ वर्षीय पदम राई  बीपीमै उपचार भइरहेको छ ।