कोशी अस्पतालको जग्गा खाली गराउन साेमबार बिहान चल्यो डोजर

विराटनगर । कोशी अस्पताल विराटनगरको स्वामित्वमा रहेको बहुमूल्य जग्गा खाली गराउन अस्पताल प्रशासनले साेमबार बिहान डाेजर चलाएकाे छ । विभिन्न संघसंस्थाले अस्पतालको जग्गा ओगटेर निर्माण गरेका २६ वटा व्यावसायिक सटरहरूमा सोमबार बिहानै डोजर चलाइएको हो ।

विराटनगर-७, अस्पताल चोकमा रहेको अस्पतालको जग्गामा नेपाल रेडक्रस सोसाइटी (ब्लड बैंक), नेपाल क्षयरोग निवारण संस्था, गणेश मन्दिर समिति र देवकोटा पुस्तकालयले स्थायी संरचना निर्माण गरी प्रयोग गर्दै आएका थिए । ती संस्थाहरुले अस्पतालको जग्गामा सटरहरू निर्माण गरी तेस्रो पक्षलाई भाडामा लगाएका थिए ।

अस्पताल प्रशासनले ती संस्थाका मुख्य प्रशासनिक भवनलाई तत्काल नछोए पनि उनीहरूले व्यापारिक प्रयोजनका लागि भाडामा लगाएका २६ वटा सटर भत्काइदिएको हाे ।

डोजर चलाउने क्रममा सम्भावित तनावलाई मध्यनजर गर्दै ठूलो संख्यामा सुरक्षाकर्मी परिचालन गरिएको थियो । मोरङका प्रहरी प्रमुख (प्रहरी उपरीक्षक) कबित कटवाल र सहायक प्रमुख जिल्ला अधिकारी सरोज कोइरालासहितको टोली सटर भत्काउन खटिएका छन् ।

यसअघि असार २१ गते गृहमन्त्री सुदन गुरुङ र स्वास्थ्य मन्त्री निशा मेहताले अस्पतालको स्थलगत अनुगमन गर्दै सरकारी जग्गामा रहेका अनाधिकृत संरचना तत्काल हटाउन निर्देशन दिएका थिए । मन्त्रीहरूको निर्देशनलगत्तै अस्पताल प्रशासनले ७ दिने सार्वजनिक सूचना जारी गरेको थियो । गत असार ५ गते १५ दिने सूचना जारी गरेकाे थियाे ।

अस्पताल प्रशासनले दिएको अन्तिम समयसीमा भित्रै अधिकांश व्यवसायीले आफ्ना सामानहरू हटाइसकेका थिए । खाली अवस्थामा रहेका सटर प्रयाेग गर्न नमिल्ने गरी भत्काइएकाे हाे ।