गाँजा छाडेर पाेखरीमा बेपत्ता युवक अझै भेटिएनन्

विराटनगर । विराटनगर महानगरपालिका – १८ भेडियारीमा गाँजासहितको भारतीय नम्बर प्लेटको मोटरसाइकल छाडेर पोखरीमा बेपत्ता भएका युवक अझै फेला परेका छैनन ।

मोरङ प्रहरीका डीएसपी सन्तोष श्रेष्ठका अनुसार बुधबार बिहान ८ः५० बजेतिर मोटरसाइकल चालक विराटनगर महानगरपालिका–१८ का मञ्जितकुमार यादव भेडियारी पोखरीमा बेपत्ता भएका हुन् ।

बेपत्ताकाे खाेजीका लागि बुधबार गाेताखाेरकाे टाेली परिचालन भएकाे थियाे । तर, गाेताखाेरले फेला पार्न सकेन् ।  बिहीबार पनि खाेजी कार्य भइरहेकाे प्रहरीले जनाएकाे छ ।

उनीसँगै रहेका भारतको सुपौल जिल्ला गनौरा पञ्चायत–५ का ४१ वर्षीय शिवधर यादवलाई पक्राउ गरिएको डीएसपी श्रेष्ठले बताए । उनका अनुसार मोटरसाइकलको पछाडि बसेका यादवले बोकेको झोला चेकजाँच गर्दा लुकाइछिपाइ राखिएको ६ किलो १३० ग्राम गाँजा बरामद भएको थियाे ।

बरामद गरिएको गाँजा र नियन्त्रणमा लिइएको मोटरसाइकलसहित यादवलाई इलाका प्रहरी कार्यालय रानीमा राखेर थप अनुसन्धान अघि बढाइएको श्रेष्ठले बताए ।