अभिषेक गिरीलाई रातारात काठमाडौं लगियो

विराटनगर । जिल्ला अदालत मोरङले हाजिरी जमानीमा छाड्ने आदेश दिएलगतै पक्राउ परेका आपराधिक पृष्ठभूमिका अभिषेक गिरीलाई मोरङ प्रहरीले काठमाडौं पठाएको छ ।

ठगी र आपराधिक विश्वासघात मुद्दामा अनुसन्धानका लागि नेपाल प्रहरीको केन्द्रीय अनुसन्धान ब्यूरो (सीआईबी) पठाएकाे हाे ।

मोरङ प्रहरीले संगठित अपराध र सम्पत्ति शुद्धीकरण मुद्दामा म्याद थपका लागि गिरीलाई सोमबार जिल्ला अदालत मोरङमा उपस्थित गराएको थियो । तर, न्यायाधीश टंकबहादुर महतको इजालसले उच्च अदालतकाे आदेश देखाउँदै गिरीविरुद्ध म्याद थप गर्न अस्वीकार गर्दै हाजिरी जमानीमा छाड्ने आदेश दिएको थियो ।

मोरङ प्रहरी प्रमुख एसपी कवित कटवालका अनुसार सीआईबीले गिरीमाथि ठगी र आपराधिक विश्वासघात मुद्दामा पक्राउ अनुमति लिएका कारण थप अनुसन्धानका लागि काठमाडौं पठाइको हो ।

विराटनगरबाट काठमाडौं लैजाने क्रममा गिरीले आफूलाई मार्ने प्रयास भइरहेको गुनासो गरेका छन् । काठमाडौं लैजान खोज्दा नमानेपछि प्रहरीको टोलीले उनलाई जवरजस्ती बोकेर लगेकाे थियो । सोही क्रममा उनले आफूलाई मार्ने प्रयास भइरहेको गुनासो गरेका हुन् । ‘मलाई मार्ने प्रयास भइरहेको छ, मलाई काटेको छ, कुटेको छ,’ उनले भने,‘ मलाई दुःख दिएर मार्ने प्रयास भइरहेको छ ।’