ग्रामथानमा महिलाकाे हत्या, देवर पक्राउ

विराटनगर । मोरङको ग्रामथानमा सोमबार राति महिलाकाे हत्या गरेकाे आराेपमा प्रहरीले एक युवकलाई पक्राउ गरेकाे छ ।

ग्रामथान गाउँपालिका–६ झोवावनी बस्ने कपिल खवासकी पत्नी २० वर्षीया सीमा राजवंशीको हत्या आराेपमा उनकै देवर २१ वर्षीय सौचन राजवंशी पक्राउ परेका हुन् । उनले घाँटीमा खुकुरी प्रहार गरेर सीमाको हत्या गरेको प्रारम्भिक अनुसन्धानबाट खुलेको  मोरङ प्रहरीका डीएसपी सन्तोष श्रेष्ठले बताए ।

देवको खुकुरी प्रहारबाट सीमाको घाँटी छिनेको र घटनास्थलमै मृत्यु भएको प्रहरीले जनाएको छ । घरको आँगनमा हत्या गरेपछि घिसार्दै शौचालयनजिक लगेर शव फालेको पाइएको छ । घटनास्थल रक्ताम्य छ ।

सौचनले भाउजूको हत्या गर्नुको कारण खुल्न बाँकी रहेको र थप अनुसन्धान भइरहेको डीएसपी श्रेष्ठले बताए । देवर–भाउजूबीचको झगडा छुट्याउने क्रममा सौचनका ठूलोबुवा शिवलाल खवास घाइते भएका छन् ।

खुकुरीले दाहिने कुममा गहिरो चोट लागेका उनको नेता चोकको स्थानीय मेडिकलमा उपचार भइरहेको प्रहरीले जनाएको छ । प्रहरीका अनुसार शिवलालको अवस्था मध्यम छ ।