कोशी र बीपीकाे अतिक्रमण एकसाता भित्र हटाउन दुई मन्त्रीकाे निर्देशन

विराटनगर । कोशी प्रदेशका दुई ठूला सरकारी स्वास्थ्य संस्था कोशी अस्पताल विराटनगर र धरानस्थित बीपी कोइराला स्वास्थ्य विज्ञान प्रतिष्ठानको अतिक्रमित जग्गा फिर्ता गराउन सरकारले कडा कदम चालेको छ ।

आइतबार गृहमन्त्री सुधन गुरुङ र स्वास्थ्यमन्त्री निशा मेहताले दुवै अस्पतालको स्थलगत निरीक्षण गर्दै अनधिकृत रूपमा प्रयोग भइरहेका सरकारी सम्पत्ति एक साताभित्र खाली गराउन निर्देशन दिएका हुन् ।

कोशी अस्पतालको स्वामित्वमा रहेको बहुमूल्य जग्गामा वर्षौदेखि रेडक्रस, क्षयरोग निवारण संस्था र मन्दिरले व्यापारिक संरचना बनाएर प्रयोग गरिरहेका छन् । आइतबार अस्पताल  निरीक्षणका क्रममा गृहमन्त्री गुरुङले एक औषधि पसल सञ्चालकलाई सोधे, ‘कन्ट्र्याक्ट पेपर कहाँ छ ? सरकारी जग्गामा बसेर समितिलाई भाडा बुझाउने होइन ।’

अस्पताल प्रशासनले यसअघि दिएको १५ दिनको समयसीमा सकिए पनि संरचना नहटेपछि स्वास्थ्यमन्त्री मेहताले अब सरकार सिधै कार्यान्वयनमा जाने बताए ।

अस्पतालले आफ्नो जग्गा प्रयोग गर्न नपाए पनि राजस्व सरकारलाई बुझाइरहेकाे छ । रेडक्रस र क्षयरोग निवारण संस्था जस्ता निकायले अस्पतालको जग्गामा सटर बनाएर मासिक लाखौँ भाडा असुलिरहेको पाइएको छ ।

धरानस्थित बीपी प्रतिष्ठानमा पनि अनधिकृत रूपमा प्रयोग भइरहेको गल्फ क्लब र सात वर्षदेखि प्रयोगविहीन अवस्थामा रहेका १० वटा आवास गृहको मन्त्रीद्वयले निरीक्षण गरे ।

गृहमन्त्रीले प्रतिष्ठानको जग्गा व्यक्ति वा समूहले अनुमति बिना प्रयोग गरेको पाइए तत्काल कानुनी प्रक्रिया अघि बढाउन स्थानीय प्रशासनलाई निर्देशन दिए ।

प्रतिष्ठानभित्रका बेथिति, बिचौलियाको चलखेल र औषधि व्यवस्थापनबारे पनि मन्त्रीहरूले तीन घण्टा लामो छलफल गरेका थिए । गल्फ मैदानलाई पर्यटन र प्राकृतिक उपचार केन्द्रका रूपमा बहुउद्देश्यीय ढङ्गले विकास गर्ने योजना समेत अघि सारिएको छ ।