आज प्रदेशकाे बजेट सार्वजनिक हुँदै

विराटनगर । संवैधानिक प्रावधान अनुसार आज सातवटै प्रदेशले नयाँ आर्थिक वर्ष २०८३–८४ का लागि बजेट सार्वजनिक गर्दैछन् । सात वटै प्रदेशले प्रदेशसभा बैठक मार्फत बजेट सार्वजनिक गर्नेछन् ।

कोशी प्रदेशको बजेट सार्वजनिक गर्नका लागि दिउँसो ४ बजे प्रदेशसभा बैठक बस्दैछ । बैठकमा आर्थिक मामिला तथा योजना मन्त्री बिदुर लिङ्थेपले बजेट पेश गर्नेछन् ।  आर्थिक मामिला तथा योजना मन्त्रालय स्रोतका अनुसार यो वर्ष बजेटको आकार बढ्ने छ । मन्त्रालय स्रोतका अनुसार यो वर्षको बजेट ४० अर्ब हाराहारी हुनेछ ।

संघबाट आउने अनुदान साढे १६ अर्ब, राजस्व बाँडफाँटबाट १३ अर्ब र आन्तरिक आम्दानी र संचित कोषमा जम्मा भएको रकमलाई आधार मानेर आकार बढाउन लागिएको हो ।

प्रदेश सरकारले चालु आर्थिक वर्षका लागि ३५ अर्ब ८७ करोड ९९ लाख रुपैयाँको बजेट विनियोजन गरेको थियो । तर मध्यवधी समिक्षा मार्फत बजेट अनुमान ३२ अर्ब ४५ करोड ६४ लाख रुपैयाँमा झारिएको थियो ।

यो वर्ष प्रदेश सांसदहरुले आफ्नो क्षेत्रमा पाउने बजेटको आकार पनि बढेको छ । सरकारले प्रत्यक्ष निर्वाचित सांसदलाई चार करोड र समानुपातिक सांसदका लगि २ करोड ५० लाखका दरले योजना समावेश गरेको छ । सरकारले करिब ५ अर्ब बराबरका नयाँ बहुवर्षीय आयोजना थप पनि गरेको छ ।