निजीमा स्वास्थ्य बीमा रोकिएपछि कोशी अस्पतालमा बढ्याे भिड

विराटनगर । विराटनगरकाे चर्काे गर्मीकाबीच विराटनगरस्थित कोशी अस्पतालमा बिरामीको थामिनसक्नु भिड छ । स्वास्थ्य बीमा बोर्डले जेठ १६ गतेदेखि निजी अस्पतालहरूमा आकस्मिक बाहेकका बीमा सेवा बन्द गरेपछि काेशी अस्पतालमा भिड बढेकाे हाे ।

निजी अस्पतालले बीमा सेवा दिन छोडेपछि कोशी प्रदेशकै ठुलो सरकारी अस्पताल ‘कोशी अस्पताल’मा बिरामीको चाप बढेकाे हाे । पहिले दैनिक १ हजारसम्म बिरामी आउने काेशीमा हिजाेआज दैनिक २ हजारभन्दा बढी विरामी पुग्ने गरेका छन् ।

अस्पतालका मेडिकल सुपरीटेण्डेन्ट डा. रामनारायण चौधरीका अनुसार विरामीकाे चाप बढ्दा सेवा प्रवाहमा समस्या छ । सीमित जनशक्ति र पूर्वाधारका कारण सेवा प्रवाहमा समस्या भइरहेकाे उनकाे भनाई छ ।

कोशी प्रदेशमा कुल जनसंख्याको ५२ प्रतिशत नागरिक बीमामा आबद्ध छन् । यसअघि ११३ वटा स्वास्थ्य संस्थाबाट सेवा पाइरहेका उनीहरू अहिले ३ ठुला मेडिकल कलेजसहित २१ वटा निजी अस्पतालबाट सेवा नपाउँदा समस्यामा छन् ।

विराट मेडिकल कलेजका सञ्चालक डा. ज्ञानेन्द्रमान सिंह कार्की राज्यको अदूरदर्शिताका कारण समस्या देखिएकाे बताउँछन् । ‘सरकारी अस्पतालमा न पर्याप्त जनशक्ति छ, न आधुनिक प्रविधि । यस्तो अवस्थामा निजीलाई बाइपास गरेर बिरामीलाई सरकारीमै जाऊ भन्नु नागरिकको स्वास्थ्य अधिकारमाथिको गम्भीर खेलवाड हो’ उनले भने ।