विराटनगरमा विद्युत सेवा अवरुद्ध

विराटनगर । सुनसरीकाे दुहबी ग्रिडदेखि टंकी सबस्टेशनसम्म आएको ३३ केभी प्रसारण लाइनमा प्राविधिक समस्या देखिएपछि विद्युत् सेवा अवरुद्ध भएकाे छ । विराटनगर र बूढीगंगालगायत क्षेत्रमा विद्युत अवरुद्ध बनेको हो ।

प्रसारण लाइनमा समस्या आएपछि विराटनगर महानगरपालिका र बुढीगंगा गाउँपालिकाका धेरै क्षेत्रमा सोमबार बिहान साढे ४ बजेदेखि विद्युत् आपूर्ति अवरुद्ध भएको हाे ।

विद्युत् प्राधिकरणका अनुसार प्राविधिक टोलीले समस्या पहिचान तथा समाधानका लागि लाइन पेट्रोलिङको काम तीव्र रूपमा अघि बढाइरहेको छ ।

प्रसारण लाइनमा आएको समस्याका कारण टंकी सबस्टेशन अन्तर्गतका सबै फिडर प्रभावित भएका छन् ।

प्राधिकरणले समस्या समाधान हुनासाथ विद्युत् आपूर्ति पुनः सञ्चालन गरिने जानकारी दिएको छ ।