आधा घण्टाका लागि स्थगित प्रदेशसभा बैठक तीन दिन पर सर्याे

विराटनगर । कोशी प्रदेश सरकारको नीति तथा कार्यक्रम पारित गर्ने प्रक्रियाका कारण सुरु भएकाे विवाद समाधान नभएपछि प्रदेशसभाको बैठक जेठ १६ गतेसम्मका लागि स्थगित भएको छ ।

बुधबारको बैठकमा प्रमुख प्रतिपक्षी दलका सांसदहरूको अवरोध र रोष्ट्रम घेराउ गरेपछि सभामुख अम्बरबहादुर विष्टले आधा घण्टाका लागि बैठक स्थगित गरेका थिए । त्यसपछि बैठक बस्न नसकेपछि सूचना टाँस गरी बैठक स्थगित भएको प्रदेशसभा सचिवालयका सूचना अधिकारी निरोज ढकालले जानकारी दिए । उनका अनुसार अर्को बैठक जेठ १६ गते दिउँसो १ बजे बस्नेछ ।

मंगलबार सभामुख विष्टले संशोधनका लागि समय नदिई प्रदेश सरकारकाे नीति तथा कार्यक्रम ‘सर्वसम्मति’ ले पारित भएको घोषणा गरेका थिए । त्यसलगतै प्रतिपक्षी दलले विरोध गरे । आफूहरूले समर्थन नगरेको अवस्थामा सर्वसम्मति भन्नू संसदीय मर्यादाविपरीत भएको तर्क प्रतिपक्षको छ ।

बुधबारको बैठक सुरु हुनासाथ प्रतिपक्षी दलका नेता इन्द्रबहादुर आङ्बोले संसद्को स्थापित मान्यता तोडेर अघि बढ्न नमिल्ने बताए । ‘प्रतिपक्षीले स्विकार नगरेकाे कार्यक्रम कसरी सर्वसम्मत हुन्छ ?’ उनले भने,‘ बहुमतले पारित गरेको घोषणा नगरेसम्म  सदन चल्न सक्दैन ।’

सभामुखले प्रतिपक्षीको अवरोधका बावजुद कार्यसूची अघि बढाउन खोजेपछि सदन तनावपूर्ण बन्याे । प्रतिपक्षकाे विराेधका बावजुत सभामुखले जसपा सांसद निर्मला तावा लिम्बूलाई बोल्न समय दिएपछि आक्रोशित बनेका पूर्वमुख्यमन्त्री एवं नेकपा सांसद राजेन्द्र राई दौडिएर रोष्ट्रममा पुगेका थिए । उनले रोष्ट्रममा पुगेर माइक खोस्ने प्रयास गरेपछि मर्यादापालकले उनलाई रोकेका थिए ।

विवादका बीच सभामुख विष्टले भने नियमावली अनुसार नै प्रक्रिया अघि बढेको दाबी गरे । उनले छलफलका क्रममा कसैले संशोधन प्रस्ताव दर्ता नगरेको र हुन्न भन्ने आवाज नआएका कारण परम्परा अनुसार सर्वसम्मति मानिएको बताए । नीति तथा कार्यक्रम पारित भइसकेका कारण अब फर्किने प्रक्रिया नरहेकाे उनले बताएका थिए ।

पूर्वमुख्यमन्त्री तथा प्रतिपक्षी सांसद राई नीति तथा कार्यक्रम पारित गर्दा सभामुखमा सत्तापक्षको छाया देखिएको बताउँछन् । सभामुखले विधि र स्थापित संसदीय प्रचलनभन्दा बाहिर गएर काम गरेको उनले बताए । ‘सभामुखको इन्टेन्सन भन्दा पनि अज्ञानता वा सत्तापक्षको दबाब थाम्न नसकेर उहाँले विधि मिचिरहनुभएको छ,’ उनले भने,‘ हिजो संशोधनको समय पनि दिइएन र आज विरोधका बाबजुद प्रक्रिया अघि बढाइयो ।’

सदनबाट पारित भएको नीति तथा कार्यक्रमलाई ‘सर्वसम्मति’ साटो बहुमतको प्रक्रियाबाट भन्नुपर्ने प्रतिपक्षीकाे माग छ ।

‘हामीले पारित गर्ने प्रक्रियाभित्रै विरोध गरेका हौँ । विरोध हुँदाहुँदै सभामुखले सर्वसम्मतिले पारित भयो भन्नु गलत छ,’ उनले थपे, ‘हाम्रो माग यति हो कि त्यसलाई सर्वसम्मति नभनी ‘बहुमत’ ले पास भएको भनियोस् ।’