कोशी प्रदेश : आगामी बजेटमा उत्पादन, रोजगारी र पर्यटन मुख्य प्राथमिकतामा

विराटनगर । कोशी प्रदेश सरकारले आगामी आर्थिक वर्ष २०८३–८४ को बजेटमा उत्पादन वृद्धि, रोजगारी सिर्जना र पर्यटन प्रवर्धनलाई आफ्नो मुख्य प्राथमिकतामा राख्ने भएको छ ।

आर्थिक मामिला तथा योजना मन्त्रालयद्वारा शनिबार विराटनगरमा आयोजित ‘आर्थिक वर्ष २०८३– ८४ को बजेट तर्जुमा सम्बन्धी छलफल तथा अन्तरक्रिया’ कार्यक्रमलाई सम्बोधन गर्दै मुख्यमन्त्री हिक्मतकुमार कार्कीले यस्तो बताएका हुन् ।

छलफलमा सहभागी प्रदेश सभा सदस्यहरूले कृषिको आधुनिकीकरण, पर्यटन र बसाई–सराई न्यूनीकरणका लागि ठोस कार्यक्रम ल्याउन सरकारलाई सुझाव दिएका छन् ।

मुख्यमन्त्री कार्कीले आगामी बजेटले विशेष गरी स्थानीय उत्पादनको प्रवर्धन, गरिबी निवारण र पर्यटकीय पूर्वाधार विकासमा जोड दिने स्पष्ट पारे ।

मुख्यमन्त्री कार्कीले प्रदेशका १३७ वटा स्थानीय तहसँगको साझेदारीमा ‘एक पालिका, एक कृषि उत्पादन’ कार्यक्रम सञ्चालन गरिने बताए । ‘स्थानीय विशेषताका आधारमा उत्पादन वृद्धि गरी रोजगारी सिर्जना गर्ने र रैथाने उद्योगहरूलाई प्रोत्साहन गर्ने नीति सरकारले अघि सार्नेछ,’ उनले भने ।

प्रदेशभित्रका घरेलु उद्योगलाई प्रोत्साहन गर्न सरकारले नयाँ योजना ल्याएको छ । मुख्यमन्त्री कार्कीका अनुसार प्रदेशका चार हजार कर्मचारीलाई वार्षिक पोशाक भत्तामा थप ५ हजार ५ सय रुपैयाँ उपलब्ध गराइनेछ । उक्त भत्ता बापत कर्मचारीले हप्ताको एक दिन अनिवार्य रूपमा स्थानीय उत्पादन र स्वदेशी पहिरन लगाउनुपर्ने व्यवस्था जेठ महिनादेखि कार्यान्वयनमा ल्याइएको उनले बताए । यसबाट करिब दुई सय घरेलु उद्योगलाई प्रत्यक्ष राहत पुग्ने सरकारको विश्वास छ ।

पर्यटन क्षेत्रको विकासका लागि आगामी आर्थिक वर्षलाई ‘भिजिट कोशी’ वर्षका रूपमा घोषणा गर्ने सरकारले विदेशमा रहेका नेपालीहरूलाई प्रदेशका पर्यटकीय स्थलहरूको भ्रमणका लागि निमन्त्रणा गर्नेछ । प्रदेशका २९ वटा पालिकालाई जोड्ने गरी चारवटा प्रमुख पदमार्ग निर्माण सम्पन्न गर्ने लक्ष्य छ । यसले ग्रामीण अर्थतन्त्र र रोजगारीमा ठूलो टेवा पुग्नेछ ।

आर्थिक मामिला तथा योजना मन्त्री विदुरकुमार लिङथेपले प्रदेश सरकारको ‘उदय परियोजना’ मार्फत साना तथा मझौला उद्योगको विकास र ब्याज अनुदानमार्फत कृषिको आधुनिकीकरणमा सहयोग पुग्ने बताए ।

भौतिक पूर्वाधार विकास मन्त्री प्रदीपकुमार सुनवारले पहाडी तथा हिमाली क्षेत्रबाट भइरहेको तीव्र बसाई–सराई रोक्न प्रभावकारी योजना ल्याउने बताए । प्रदेश सांसदहरूलाई ‘एक जिल्ला, एक साझा योजना’को अवधारणामा अघि बढ्न आग्रह गरे ।

प्रदेशका मुख्य सचिव राजेन्द्रकुमार पौडेलले आगामी बजेट आयआर्जन, रोजगारी, स्वास्थ्य र शिक्षामा सबैको पहुँच पुग्ने गरी आउने बताए ।