मोरङमा अवैध क्रसर उद्याेग : दुई उद्याेग बन्द, एउटालाई जरिवाना

विराटनगर । मोरङ जिल्लामा मापदण्ड विपरीत र अनुमति विना सञ्चालन भइरहेका क्रसर तथा बालुवा प्रशोधन उद्योगमाथि स्थानीय प्रशासनले कारबाही गरेकाे छ । एउटा उद्देश्यका लागि अनुमति लिएर अर्कै व्यवसाय सञ्चालन गरिरहेको पाइएपछि जिल्ला अनुगमन समितिले मोरङका दुई वटा उद्योग बन्द गराएको हाे । एउटालाई नगद जरिवाना गरेको छ ।

बेलबारी, मिक्लाजुङ र लेटाङ क्षेत्रमा सञ्चालित यी उद्योगहरूले अवैध रुपमा ढुंगा-गिटी उत्खनन र बिक्री गरिरहेको फेला परेको हो ।

कान्तिपुर वासिङलाई जरिवाना

बेलबारीमा अवस्थित कान्तिपुर वासिङ प्रालिले बालुवा प्रशोधन (वासिङ) को मात्र अनुमति पाएको थियो । तर, अनुगमनका क्रममा अवैध रूपमा क्रसिङ (गिटी निकाल्ने) कार्य गरिरहेको भेटिएपछि गत चैत ३० गते प्रशासनले यसलाई बन्द गराएको थियो । औद्योगिक व्यावसायिक ऐन अनुसार उद्योगलाई ५० हजार रुपैयाँ जरिवाना गरेकाे छ । जरिवानापछि हाल बालुवा प्रशोधनका लागि मात्र सञ्चालन अनुमति दिइएकाे छ । अनुमति बिना ढुंगा-गिटी बिक्री गरी कर छली गरेको आशंकामा थप अनुसन्धानका लागि आन्तरिक राजस्व कार्यालयलाई पत्र पठाइएको अनुगमन समितिले जनाएको छ ।

लेटाङमा सञ्चालित महाभगवती क्रसिङ प्रालि कुनै पनि सरकारी निकायमा दर्ता नभई सञ्चालनमा रहेको पाइएको छ । उद्योग विभाग वा घरेलु तथा साना उद्योग कार्यालयमा दर्ता भएको प्रमाण पेश गर्न नसकेपछि यसलाई तत्काल बन्द गरी थप कारबाहीका लागि सिफारिस गरेकाे हाे । उद्योगले ठूलो परिमाणमा ढुंगा-गिटी अवैध रूपमा उत्खनन गरी बिक्री गर्दै आएको थियो ।

देवीथान कङ्क्रिट उद्योग सिल

मिक्लाजुङस्थित देवीथान कङ्क्रिट उद्योगले पनि चरम लापरबाही गरेको भेटिएको छ । बालुवा प्रशोधन, ह्युमपाइप, बिजुलीको पोल र कङ्क्रिट इँटा बनाउने अनुमति लिएको उद्योगले अनुमति बिना नै क्रसिङ मेसिन चलाइरहेको फेला परेको हो । प्रारम्भिक वातावरणीय परीक्षणसमेत नगरी उत्खनन गरेकाे भेटिएकाे थियाे । कम्पनी रजिष्ट्रारको कार्यालयमा दर्ता नभई ‘प्रालि’ को नाममा फर्जी बिल काटेर बिक्री गरिरहेको पाइएपछि सिल गरेर कारवाही प्रक्रिया अघि बढाएकाे हाे ।

मोरङको ग्रामथान क्षेत्रमा पर्ने लाेहन्द्रा खोला खण्डमा मेसिन प्रयोग गरी भइरहेको अवैध उत्खननमा प्रशासनले रोक लगाएको छ । सो क्षेत्रमा भइरहेको अनियन्त्रित उत्खननको रिपोर्टिङ गर्न पुगेका पत्रकारमाथि व्यवसायीले दुर्व्यवहार गरेपछि यो विषय थप चर्चामा आएको थियो ।

मोरङका प्रमुख जिल्ला अधिकारी युवराज कटेलका अनुसार, तत्कालका लागि मेसिन प्रयोगमा रोक लगाउँदै घटनाको छानबिन गर्न एक समिति गठन गरिएको छ । समितिको प्रतिवेदन आएपछि दोषीमाथि कारबाही र थप कानुनी प्रक्रिया अघि बढाइनेछ उनले बताए ।