झापामा दुई दिनमा दुई महिलाको हत्या, दुवै आरोपी पक्राउ

विराटनगर । झापामा पछिल्लाे दुई दिनको अवधिमा दुई जना महिलाको हत्या भएको छ । साेमबार झापाकाे अर्जुनधारा नगरपालिका–८  र मंगलबार हल्दिबारी गाउँपालिका ५ मा दुई महिलाकाे हत्या भएकाे हाे । दुवै घटनामा संलग्न भएकाे आरोपीलाई प्रहरीले नियन्त्रणमा लिएको छ ।

प्रहरीका अनुसार मंगलबार राति हल्दीबारी गाउँपालिका–५ कञ्चनश्रीमा ४४ वर्षीय गोकर्ण भण्डारी आफ्नी ३३ वर्षीया पत्नी उर्मिला भण्डारीको हत्या आराेपमा पक्राउ परेका छन् । उनले धारिलो हतियार प्रहार गरी हत्या गरेकाे प्रहरीले जनाएकाे छ । घरायसी विवादका कारण मंगलबार राति यो घटना भएको प्रहरीको प्रारम्भिक अनुमान छ ।

प्रहरीका अनुसार अर्जुनधारा नगरपालिका–८ मा सोमबार राति २९ वर्षीया काजल बस्नेत सुवेदीको मृत्यु भएको  थियाे । मदिरा सेवन गरी भएको विवादका क्रममा २४ वर्षीय किरण गौतमले धकेल्दा काजलको टाउको कङ्क्रिटमा ठोक्किएको थियो । उपचारका क्रममा मंगलबार बिहान उनको मृत्यु भएकाे हाे ।

झापाका डीएसपी खगेन्द्रबहादुर खड्काका अनुसार पक्राउ परेका दुवैमाथि ‘कर्तव्य ज्यान’ मुद्दामा कानुनी प्रक्रिया र विस्तृत अनुसन्धान अघि बढाइएको छ ।