धनकुटामा मुख्यमन्त्रीकाे सम्पर्क कार्यालय : ७ वर्षदेखि प्रयोगविहीन

विराटनगर । संघीयताको मर्म अनुसार ‘शक्ति विकेन्द्रीकरण’ गर्ने नाराका साथ धनकुटामा स्थापना भएकाे कोशी प्रदेश मुख्यमन्त्री तथा मन्त्रिपरिषद्को सम्पर्क कार्यालय प्रयाेग बिहीन भएकाे छ । स्थापनाको सात वर्ष बितिसक्दा पनि कार्यालय सञ्चालनमा आउन सकेकाे छैन । भौतिक पूर्वाधार र फर्निचर प्रयोगविहीन भएर बिग्रने अवस्थामा पुगेका छन् ।

२०७६ सालमा तत्कालीन मुख्यमन्त्री शेरधन राईले धनकुटा, तेह्रथुम, संखुवासभा र भोजपुरका बासिन्दालाई विराटनगर जानु नपर्ने गरी सेवा दिने र महिनामा एक पटक मन्त्रिपरिषद् बैठक बस्ने घोषणा गर्दै कार्यालय उद्घाटन गरेका थिए । तर, सात वर्षको अवधिमा जम्मा एक पटक मात्रै धनकुटामा मन्त्रिपरिषद् बैठक बसेको थियाे ।

सुरुमा ४ जनाको दरबन्दी तोकिए पनि हाल यहाँ केवल एक जना कार्यालय सहयोगी मात्र छन् । सुरक्षाका लागि खटाइएका ५ जना प्रहरी पनि केही समयअघि हटाइएका छन् । स्थापनापछि तत्कालीन मुख्यमन्त्री शेरधन राई र त्यसपछि राजेन्द्र राई एक-एक पटक मात्र कार्यालय पुगेका छन् । अन्य मुख्यमन्त्रीहरू उद्धव थापा, भीम आचार्य र वर्तमान मुख्यमन्त्री हिक्मतकुमार कार्की पुगेका छैनन् ।

कोशी प्रदेशका मुख्य सचिव राजेन्द्रकुमार पौडेलले सम्पर्क कार्यालय प्रयाेगमा नरहेकाे बताए । उक्त संरचनालाई मनमोहन प्राविधिक विश्वविद्यालयको मेडिकल कलेजका रूपमा प्रयोग गर्न सकिनेबारे प्रारम्भिक छलफल भइरहेको उनले जानकारी दिए ।